Peligra'l llobu n'Asturies

La Coordinadora Ecoloxista d'Asturies denunció ayeri na
Conseyería de Mediu Ambiente del Principáu la riestra de muertes
de llobos que se lleven nesti añu, nel que, al dicir de los ecoloxistes, yá se lleven 15 exemplares muertos, lo representa
mas d'un 10% de la población de la especie.

La Coordinadora diz que les muertes de llobos vienen pola acción de "furtivos desconocidos" que presumen depués en público de tener mataos llobos,
durante caceríes de xabalinos y por disparos de la guardería del Principáu y de
Parques Nacionales

La presencia del llobu ta arrequexada anguaño a un númberu estable de grupos familiares dende va dellos años, siendo la población d'ente 110 y 150 exemplares, colo que nun ta xustificada nenguna caza sobre ellos, y los ecoloxistes mantienen que ye imposible qu'esta población cásique simbólica seya la responsable de los ataques al ganao de los que tanto se quexen los ganaderos.

En cuenta d'echa-yos la culpa a los llobos, la Coordinadora diz que
los ataques faenlos perros abandonaos qu'acaben por facese selvaxes, unos animales que los ayuntamientos deberíen tener más controlaos.

Respective a los daños al ganao, la Coordinadora diz que yá pidió a la conseyería que se-y metiere priesa al sistema de pagu d'indemnizaciones a daños al ganao, plantegando plazos de pagu de 45 díes y otres midíes compensatories. El furtivismu y l'echar venenu pel
monte son otros dos grandes peligros pa la población de llobos que, dende la Coordinadora, dicen que la Conseyería nun foi quien a desaniciar