Pedro Solbes, del Eurostat al cielu

L'ex - comisariu d'Asuntos Económicos y Monetarios de la Xunión Europea Pedro Solbes ye'l vicepresidente segundu y ministru d'Economía del nuevu gobiernu socialista de Rodríguez Zapatero. Ye la segunda vegada en que Solbes entra al gobiernu dempués d'ocupar el mesmu cargu na llexislatura 1993-1996, la última de Felipe González. Pela so parte, Rodrigo Rato dexa'l cargu de ministru dempués d'ocho años anque'l políticu del PP d'orixe asturianu ta agora enfotáu n'algamar el llambión puestu de director del Fondu Monetariu Internacional (FMI).

1999 foi'l gran añu de Pedro Solbes cuando nel mes de xunetu salió comisariu d'Asuntos Económicos y Monetarios de la Xunión Europea nel equipu del Presidente de la Comisión Europea Romano Prodi. Nesti puestu, el valencianu tuvo un de los sos ésitos cola implantación del euru nel Vieyu Continente. Nel llau negativu apaez nel historial de Solbes el casu de corrupción más importante de la Comisión; el casu Eurostat, l'organismu estadísticu de la Xunión Europea que dependía directamente del comisariu Solbes y que vendió illegalmente informaciones estadístiques oficiales. Esti casu de corrupción tuvo a puntu de costá-y el puestu y la carrera política

D'otra manera, l'asturianu Rodrigo Rato dexa'l cargu de Ministru d'Economía dempués d'ocho años nos que dexó al Estáu Español con un de los meyores cuadros macroeconómicos de la Xunión Europea, ello mientres la crisis castiga a Francia y Alemaña. El prestixu consiguíu con esos datos "macro" - y tamién con unes cuestionables estadístiques microeconómiques- ye'l mesmu que puede llevar agora al ex - ministru a la dirección del FMI. El so rival directu pal puestu ye'l francés Jean Lemierre, anguaño presidente del Bancu Européu de Reconstrucción y Desarrollu (BERD). Pero'l casu ye que'l francés malpenes tien el sofitu de Francia y Alemaña, mentanto Rodrigo Rato yá cuenta col d'España, el de los países llatinoamericanos y países europeos como Lluxemburgu, Portugal o Austria. De toles maneres ya se ruxe per Wall Street qu'Estaos Xuníos cuenta col ex - ministru d'Aznar pal cargu del FMI como da anuncia'l Financial Times, ente otros medios. La esperiencia política de Rato, la bona xestión económica, la conocencia de los países llatinoamericanos (primeros receptores de les ayudes del FMI) y la posición del gabinete Aznar na Guerra y posterior ocupación d'Iraq son les razones del sofitu norteamericanu.