Pasu de xigante del Lealtad hacia l'ascensu

|
Villarrobledo 0-1 Lealtad (22 de xuneu del 2019) Gol de Zucu

Los maliayos ganaron 0-1 al Villarrobledo con un gol de Zucu nel 93. El Marino empató ensin goles en Miramar col Sestao River.

Nun partíu mui difícil nel que'l trabayu na portería de Javi Porrón foi clave, el Lealtad consiguió un botín importante nun Municipal de La Virgen enllenu pa la ocasión por casi 4.000 persones. La espulsión del llocal Dani Cabezuelo nel minutu 60 al frenar una acabalgada de Saha cuando yera l'home últimu nun empequeñeció al Villarrobledo, que tuvo ocasiones pa llevar el partíu.

Sicasí, un saque de banda nel añadíu baxólu'l xigante senegalés dientro del área, que se xiró beneficiándose del so físicu y punxo un centru rasu que, a la segunda, pudo rematar Zicu a gol énte la desesperación de la defensa. El domingu, a les 18 hores, los de Samuel van tratar de facer bona la ventaya algamada en Villarrobledo pa xubir a Segunda División B.

El preciu de les entraes va ser de 10 euros pa socios, mentes que pal públicu adultu va costar 15 y 5 pa los menores de 16 años. Tamién tán a la venta de manera anticipada por 12 euros en llugares entovía por confirmar.

Portería a cero

El Marino consiguió dexar la portería a cero nel partíu d'ida de la eliminatoria decisiva pol ascensu col Sestao River, anque nun foi quien a superar al conxuntu vascu. Con un gran ambiente en Miramar, onde se xuntaron cerca de 3.000 espectadores con una amplia representación visitante, dambos equipos evitaron l'error pa dexalo too pa la vuelta, que va tener llugar el sábadu a les 19 hores en Las Llanas.

El club de Lluanco entama un viaxe pa la so afición a Sestao a un preciu de 32 euros, entrada inclusive. Pa mozos de 10 a 18 años el so costu ye de 23, mentes que los menores han de pagar 20.

La salida ta prevista a les 10 hores de la estación d'autobuses y los interesaos han d'inscribise en Muebles Novar, Bar El Campo, Inmobiliaria Api Fleta o Cafetería Alejandra. Les persones que quieran viaxar pela so cuenta, tamién pueden mercar les entraes pal partíu nestos establecimientos.

Na imaxe, los xugadores del Lealtad celebren el gol de Zucu. Semeya propiedá del Club Deportivo Lealtad.

 

Contador Estadistiques