Partíos nacionalistes de toa Europa améstense nun partíu políticu nuevu.

L'Alianza llibre Europea, que celebra'l so congresu constituyente en Barcelona, va dir a les elecciones europees del 13 de xunu y ígüenla partíos nacionalistes y rexonalistes de toa Europa. El secretariu xeneral d'Esquerra Republicana de Catalunya, Carod Rovira, daba esta mañana la ponencia inaugural del congresu fundacional d'esta formación nueva creada un poco como consecuencia de la llei nueva europea de Partíos políticos. Xunta la mesma ERC, son parte de l'ALE'l Bloque Nacionalista Gallegu, Eusko Alkartasuna, el Partíu Andalucista y grupos nacionalistes y rexonalistes de Córcega, Bretaña, Escocia, Gales, Moravia, Tirol, Alsacia o Cornualles. Pol estáu Español, hai tamién partíos qu'entren a l'ALE como observadores, casu del PNV, Partit Socialista de Mallorca - Entesa Nacionalista y la Chunta Aragonesista. El Bloc Nacionalista Valenciá tamién participa d'esta iniciativa política a títulu d'observador anque nel Bloc hai rocea porque ERC vetó la so presencia en Congresu.

Los diputaos que consiga ALE el 13 de xunu van facer grupu parlamentariu conxuntu en Bruseles colos Verdes Europeos, pero ello nun quier dicir que tolos partíos de l'ALE vayan dir baxo una mesma llista a les elecciones del 13-6, a les que caún pue concurrir en solitario o amestándose con quien-y pete. Asina, los firmantes de la Declaración de Barcelona, (PNV, CiU y BNG) yá dieron anuncia de que van facer una llista conxunta .