Parque eólicu pa Cangas

El Conceyu de Cangas del Narcea va contar con un nuevu parque eólicu na Sierra de Cadrixuela. La Comisión d'Infraestructures, Urbanismu y Mediu Ambiente del Ayuntamientu de Cangas dio de pasu esta mesma mañana la propuesta de la empresa Terranova Energy, que yá trabaya con otres instalaciones de molinos nel occidente asturianu pa instalar un parque eólicu na Sierra de Cadrixuela. Agora'l proyectu queda en manes de Mediu Ambiente nel Principáu, que tien que dar el preste definitivu

Según l'informe qu'apurrió la empresa, nel parque van invertise 21.876.840 euros, 3.640 millones de les antigües pesetes. La casa concesionaria del parque tamién diz que l'asitiamientu del parque garantiza un impactu paisaxísticu mínimu col meyor aprovechamientu eléctricu. En cuantes a creación de puestos de trabayu, el parque va precisar d'unes sesenta persones pa la obra y, n'echando a andar, va precisar de cuatro persones trabayando. El conceyu cuenta con ingresar 34.257 euros (5.700.000 pesetes) al añu en conceptu d'impuestu d'actividaes económiques pola instalación del parque, anque los rexidores cuenten con sacar tamién ingresos a cuenta del impuestu sobre bienes inmuebles y pol alquiler de los praos au van mangase los xeneradores.

El parque va tener a la fin una llinia de catorce xeneradores de dos megavatios de potencia caún, lo que remocica'l proyectu orixinal que se-y presentó a Industria nel 2.001 y nel qu'apaecíen 29 xeneradores de 850 mw. La empresa quier facer del parque un llugar que pueda visitase y nel que se faigan actividaes pal públicu, y garantiza que'l parque va quedar mui apantalláu por otros montes, amenorgando enforma l'impactu visual.