Parmalat, l'escándalu financieru del añu

Depués del escándalu de la llétrica americana ENRON y del esfarraple d'Arthur Andersen, los casos d'empreses famoses y supuestamente solventes que desapaecen ente pómpares finacieres, contabilidaes "creatives" e inversiones en paraisos fiscales tan acabante d'aterrizar na vieya Europa cola crisis de la llechera italiana Parmalat, ún de los xigantes nel mercáu alimentariu La gravísima crisis del grupu italianu, que tien un furacu de más de 5.000 millones de dólares pon en dulda'l futuru de les sos filiales, ente elles la de la península ibérica, CLESA.

Anque dende Clesa anuncien que son independientes xurídica y financieramente del conglomeráu italianu y anque hasta'l mesmu ministru d'Agricultura Arias Cañete defende que Clesa tien solvencia dafechu en tolos sos activos yá se ruxe per ende qu'hai movimientos corporativos nel sector. Énte la gravedá de la crisis de la matriz, lo más fácil ye que CLESA acabe vendiéndose a otra compañía llechera, y yá hai una llista de posibles compradores na qu'apaecen Dean Foods, propietaria de la marca Leche Celta, la fusionada Ebro Puleva y la compañía Leche Pascual. La que nun suena de momentu na quiniela ye l´asturiana CAPSA, compañía líder nel sector y con gana de medrar, como bien demostró la fallida operación de fusión con Leche Pascual.

El que ta acabante de convertise nel Enron européu, Parmalat, mercó CLESA hai yá cinco años a les families Gil y Pérez de Andujar por un total de 132 millones d´euros. D'entós p'acá la empresa sigue dirixía polos fundadores ensin demostrar Parmalat más interés por un mercáu llecheru ibéricu cada vegada más concentráu y competitivu. Casu de pintar mal el futuru de CLESA hai que remembrar que la empresa tien n´Asturies ún de los sos centros productivos.