Palacios afirma que la FSA da puxu “a la manipulación y intentu d’enfrentamientu de la derecha”

|
Rafael Palacios

L’informe sobre la oficialidá sigue siendo utilizáu pol PP, Ciudadanos y VOX pa cargar contra l’asturianu. Rafael Palacios, de Podemos, rescampla los datos positivos que presenta’l documentu y considera que la FSA dio puxu “a la manipulación y intentu d’enfrentamientu y xeneración de problemes de la derecha y de la derecha estrema”.

“Nun s’entiende que nun lu diera a conocer si presenta unos datos mui positivos sobre l’impautu na xeneración d’emplegu y na economía, destacando la importancia nel PIB que tien la cultura y la llingua si se pon en valor”, espresó’l de Ciañu en declaraciones a Asturies.com llueu de la Xunta de Voceros d'esta mañana. Recuerda qu’esti espoxigue se da tanto “dende’l desarrollu más ambiciosu al más modestu de la oficialidá” y calca en que “nun hai qu’entender esta cuestión como un gastu, sinón como una inversión”.

Les trés fuercies de la derecha contraries a la oficialidá garraron estos díes l’informe como arma p’atacar al Gobiernu y, al empar, al asturianu y a la reconocencia de los derechos de los falantes de les llingües propies d’Asturies. El PP, que pidiera’l documentu a la Conseyería de Cultura, Política Llingüística y Turismu, foi’l primeru n’acusar al Executivu de mentir y, tracamundiando l’impautu económicu col costu, en tratar de da-y la vuelta al testu.

Nun tardaron VOX y Ciudadanos en sumase a la crítica, hasta’l puntu de plantegar los primeros al PP liderar una moción de censura o convertir el próximu Plenu nun monográficu sobre l’idioma. Pa Palacios l’únicu culpable de la situación ye la FSA al dar puxu “a la manipulación y intentu d’enfrentamientu y xeneración de problemes de la derecha y la derecha estrema” cola so postura.

“Barbón ha dexar de ser un observador non participante, cumplir col so compromisu y llevar l’alderique sobre la reforma del Estatutu a la Xunta Xeneral. Si’l Gobiernu y la FSA planteguen un propuesta concreta de reforma estatutaria qu’incluya la oficialidá va permitir un debate afayadizu nel Parllamentu, del que tamos seguros que van salir los votos suficientes p’aprobalu, porque los hai”, asegura.

Na semeya, Palacios nuna imaxe d'archivu obra d'Iván G. Fernández.

Contador Estadistiques