Otra selmana de xubes nes bolses

Anque les estadístiques macroeconómiques d'Estaos Xuníos nun terminen de convencer a los inversores el casu ye que cada vegada tornen más perres a la renta variable. Al final de selmana la recoyida de beneficios tiró p'abaxo peles bolses pero'l bon comportamientu del restu de la selmana dio un balance positivu. L'Ibex recuperó la cota de los 8.000 y marcó máximos anuales.

Ente les estadístiques de la selmana, los febles datos de la primer economía del mundu pesaron nos parqués bursátiles. La balanza de comercial d'Estaos Xuníos algamó un resultáu negativu de 42.500 millones de dólares, muncho peor de lo esperao, poniendo a preba la fe de los inversores na fuercia de Wall Street. Nel Vieyu Continente destacó'l datu del PIB de la Xunión Europea, que foi d'un probetayu 0,3% positivo en cuantes que yera d'esperar una tasa mayor. Les grandes economíes europees tan baxo mínimos y preba d'ello son los abultaos deficits presupuestarios d'economíes como l'alemana o la francesa. Amás el procesu desinversor de grandes multinacionales na Zona Euru ta afectando al emplegu en dellos países. Los más beneficiaos son los países europeos del Este y los asiáticos, especialmente China. Tamién n'Europa diose l'anuncia de los datos del IPC d'España que tuvo una cayida de siete décimes y la balanza comercial francesa qu'algamó un positivu 1.932 millones d'euros.

Vienres negativu pa Wall Street onde les males estadístiques d'Estaos Xuníos frenaron la xuba selmanal. L'índiz Dow Jones terminó nos 10.627,85 puntos (-0,62%). El tecnolóxicu Nasdaq tamién tuvo un pieslle a la baxa hasta los 2.053,65 (-1%). El sector tecnolóxicu foi'l más castigáu polos inversores xunta la compañía de dibuxos Disney. L'anuncia positiva foi'l bon resultáu de ventes de la informática Dell. Al otru llau del Atlánticu, Francfort y París pesllaron con abultaes perdes mentanto que la Bolsa de Llondres terminó con xuba del 1%.

La Bolsa de Madrid tuvo una selmana mui positiva, y anque'l vienres el parqué madrilanu tuvo un pieslle a la baxa, l'Ibex terminó la selmana nos 8.199,60 puntos (+2,2% selmanal). El volume de negociu sigue bien altu, hasta los 2.158 millones d'euros. Ente les cayíes, el Grupu Telefónica, los grandes bancos y el sector eléctricu tuvieron un fin selmana feble. A la contra Repsol foi una de les estrelles de la selmana pola xuba del petroleu. Amadeus tamién brilló nuna selmana onde Iberia marcó un máximu históricu al algamar los 2,86 euros acción. Acerinox tamién peslló en positivo pese a los problemes llaborales de la compañía. En xeneral la selmana tuvo una importante xuba pola revalorización de los blue chips y pol bon comportamientu de los chicharros de los que dellos yá lleven acumulaes xubes bien curioses.

Los datos macro d'Estaos Xuníos ficieron que l'euru xubiere entovía más. La divisa europea afítase nos 1,28 dólares unidá. El ruxe-rux d'una posible intervención del BCE pa frenar la peligrosa xuba del euru ta ehí. Mentanto, el petroleu caltiénse nos 30 dólares barril. La OPEP nun tien nengún interés en baxar el preciu del oru prieto como demuestren les sos. Na mesma llinia sigue'l metal amariello, que sigue con precios mui altos. El vienres pasáu l'oru peslló nos 407 dólares onza.