Ochobre ye lliterariu en Xixón

‘Ente fueyes. Ochobre lliterariu’ ye un programa entamáu pola Fundación Municipal de Cultura, Educación y Universidá Popular de Xixón “pa difundir la lliteratura asturiana”, esplicó’l so direutor, Miguel Barrero. Repártese ente actividaes nel Mercado Ecológico y Artesano na ponte festiva pola cercanía col Día de les Escritores, alcuentros colos ganadores de los Premios Lliterarios 2020 y la presentación del númberu 37 de la revista 'Lliteratura'.

El mercáu que tolos meses s’instala na Plaza Mayor coincidiendo cola segunda fin de selmana acueye les primeres cites d’esta iniciativa nueva que coordina la Oficina de Normalización Llingüística. Dende mañana y hasta’l martes, festivu a nivel estatal, los visitantes a esti espaciu van poder disfrutar de la esposición de Xosefa Xovellanos y un llugar pa facer semeyes que va pintar el sábadu l’artesana Esther Martínez, un taller infnatil de pintura y escritura, un concursu de microrrellatos y audiciones n’asturianu, y una amuesa de llibros d’escritores n’asturianu en collaboración cola Rede de Bilblioteques Municipales de Xixón.

Amás, el domingu y el martes, a les 13 hores, los asistentes van poder interactuar con Xosefa Xovellanos, que va percorrer el mercáu, a lo que va siguir un alcuentru coles autores Alma Hidalgo y Laura Marcos, de manera respeutiva, a les 13.30 hores. Toa esta programación xira al rodiu del Día de les Escritores, xornada que se celebra’l 18 d’ochobre, y busca “recalcar el papel de les muyeres qu’escribieron en llingua asturiana”, señaló Barreiro.

Capital de la cultura asturiana

En collaboración cola Conseyería de Cultura, Política Llingüística y Turismu, al traviés del ciclu Autores nel Camín, los cinco ganadores de los Premios Lliterarios 2020 van pasar per Xixón pa tener alcuentros colos llectores. El primeru va ser Xune Elipe, vencedor del XXVI Premiu Máximo Fuertes Acevedo d’ensayu por ‘Hai una llinia trazada. Historia de la música asturiana’, el xueves a les 19 hores na sala de conferencies de Centru de Cultura Antiguu Institutu, que va poner una charra al respeutu de la temática de la so obra, pa siguir el martes 19, a les 19 hores nel salón d’actos de la Escuela de Comerciu, con Alejando Fernández-Osorio, merecedor del XXVI Xuan María Acebal de poesía por ‘Tayu’.

El xueves 21 nel mesmu llugar y a la mesma hora va tar Sidoro Villa, que llevó’l XLI Premiu Xosefa Xovellanos de novela por 'El fervinchu’, y el martes 26 Alberto Vázquez, que con ‘El sol na escombrera’ convenció al xuráu del XII Premiu Alfonso Iglesias de cómic. Van poner el ramu a esta parte de ‘Ente fueyes. Ochobre lliterariu’ Vero Suari y Inaciu Galán, coautores de ‘La curuxa Catuxa’, la historia qu’algamó’l XIII Premiu María Xosefa Canellada de lliteratura infantil y xuvenil.

Antón García, direutor xeneral de Política Llingüística, acompañó a Barrero na presentación d’esta iniciativa nueva del Conceyu. Na so intervención emponderó a Xixón, “que vien funcionando como la capital de la cultura asturiana” al contar “siempre con actividaes alredor de la llingua asturiana”.

Señaló que-y “paez importante reforzar la presencia d’escritores y creadores, homes y muyeres, que se manden de la llingua asturiana a la hora de facer les sos creaciones”, rescamplando’l papel que xuega la iniciativa ‘Asturies, Cultura en Rede’, na que s’inclúi’l ciclu Autores nel Camín. “Hasta agora lo que facíemos les instituciones yera convocar el premiu, dalu y publicar los llibros”, analizó, mentes que con esti programa “facemos promoción y visibilización” moviéndolos per tol territoriu en collaboración colos conceyos.

Son cuasi 40 les sesiones entamaes nestos meses y, dada la bona esperiencia, “esperamos l’añu que vien reforzar esa presencia faciendo dalgunos cambios”. Sobre ‘Ente fueyes. Ochobre lliterariu’, García destacó la idea y la collaboración col Mercado Artesano y Ecológico y l’Academia de la Llingua Asturiana (ALLA), y insistió na importancia de dar más visibilidá a la creación.

La institución académica va encargase precisamente de pesllar el programa, yá en payares, el día 2 a les 19 hores del antepar del segundu pisu de la Escuela de Comerciu. Va ser cola presentación del númberu 37 de la revista ‘Lliteratura’, dedicáu a la traducción.

Na semeya, Javier Ruiz-Cuevas, presidente de l'Asociación Mercado Artesano y Ecológico; García; Barrero; Xosé Ramón Iglesias Cueva, secretariu de l'ALLA.