“Nun se pue utilizar dineru público pa campañes d’acosu y señalamientu”, censura Pumares

La Comisión Direutiva de Foro salió en defensa del so diputáu y secretariu xeneral Adrián Pumares, que fixo per primer vegada declaraciones sobre los cartelos firmaos por VOX y les pegatines xunto cola so imaxe y el lema ‘Cooficialidad no’. “Nun se pue utilizar dineru público pa campañes d’acosu y señalamientu”, criticó.

“Nun debemos escaecer que’l partíu políticu VOX recibe financiación pública, cuenta con recursos públicos, y ta destinando toos esos recursos que son de tolos y toles españoles, de tolos asturianos y asturianes, en campañes d’acosu personal contra otros diputaos de la Xunta Xeneral. Eso ye intolerable”, afirmó’l tamién voceru parllamentariu, que recibió numberos mensaxes de sofitu de miembros del so partíu y d’adversarios políticos.

A última hora d’ayeri la Comisión Direutiva de Foro aprobaba por unanimidá una declaración d’apoyu a Pumares y de condena a la “campaña d’acosu y señalamientu” que ta viviendo nos díes últimos. Tamién defendió la so “absoluta independencia na toma de decisiones sobre’l posicionamientu políticu de Foro Asturias y sobre cuantes otres cuestiones deba pronunciase, agora y nel futuru”.

“La Comisión Direutiva recuerda que nunca-y tembló’l pulsu p’adoptar decisiones en contra del autoritarismu, el totalitarismu y otres maniobres de la vieya política, que Foro Asturias refuga dafechu; y garantiza a la sociedá asturiana que se va caltener firme nel so compromisu col rigor y el respetu na aición política, cola so posición centrada nel espaciu políticu alloñada de tou estremismu políticu d’ún y otru llau, asina como pola defensa en tou momentu del bien d’Asturies”, finó la declaración.

Na semeya, ún de les valles publicitaries de VOX.