Nun hai grupu d'asturianu

La condición d'asignatura
optativa de la enseñanza de llingua asturiana nun garantiza que los
rapacinos que los sos padres matriculen n'asignatura d'asturianu puedan dar la
enseñanza. Asina lo vivió en carne propio una familia
d'Uviéu qu'apuntó a la so fía pa clase d'asturianu en
primer cursu de la ESO nel institutu "Monte Naranco" d'Uviéu.
Al nun haber rapacinos abondos pa dar la clase d'asturianu (namás lo
pidieron 3, según la dirección), el centru nun fizo grupu
d'asturianu y pasó automáticamente a la neña pal grupu de
francés, la otra optativa que s'ufiertaba xunta l'asturianu y que los
padres escoyeron mayoritariamente.



Esta situación nun ye nueva, nin con muncho. Tolos años,
en bien d'institutos, la falta del númberu mínimu d'ocho alumnos
que pide la Conseyería pa facer grupu d'asturianu obliga a rapacinos que
se matricularon d'asturianu a dar otres asignatures coles que l'asturianu
compite na ufierta d'optatives. Lo que sí que ye nuevo ye que unos
padres decidan facese insumisos énte esta realidá como ficieron
Arturu Xosé Bermeyu y Dulce Mª Xil, qu'ayeri dieron una rueda de
prensa pa esplicar la so situación y la de la so fía Catuxa. Dende qu'entamó'l cursu, la
fía d'Arturu y Dulce nun va a la clas de francés onde la
empobinó l'institutu, y en cuenta d'ello son los mesmos padres los que-y
ponen clas d'asturianu na cafetería del centru nes hores en que los
demás neños reciben enseñu de francés.



El casu ye enforma irregular, y de seguir asina, al quedar l'alumna
suspensa en francés, pasaría pal otru cursu con una asignatura
pendiente, ello aparte de les molesties qu'esta situación-yos
supón a padres y alumna. Anque la familia denuncia la
"represión a los sos derechos como falantes" que supón
el nun poder matricular a la fía n'asturianu, la llei nun los defende, y Juan Carlos Castañón, del sindicatu SUATEA esplicó que lo que tan faciendo dende
l'institutu ye llegal dafechu, en cuantes que ta echándose al pie de la
norma. Ello ye que, al ser l'asturianu asignatura optativa, nun esiste
obligación de facer el grupu si nun piden l'asignatura'l mínimu
d'alumnos qu'apaute l'alministración, mientres que si l'asturianu fuere
asignatura voluntaria, como ye'l casu de la relixón, anque namás
hubiere ún solicitante, tendríen de poné-y clase.

El sindicalista, qu'espresó'l sofitu de SUATEA a la familia, esplicó que, anque esiste una voluntá sindical mayoritaria de facer l'asturianu voluntariu y non optativu, la Conseyería d'Educación
nun tien intención de camudar l'estatus de l'asignatura, y sorrayó la
política revesosa que dacuando siguen los centros, qu'empobinen, d'una
manera más o menos evidente, a matricular a los fíos
n'asignatures distintes al asturianu. D'otra manera, Castañón dio dellos apuntes sobre la difícil situación del alumnáu que fala n'asturianu, esplicando ente otres coses como los alumnos monollingües puntuen baxo nes prebes sicométriques al nun entender les entrugues que-yos faen en castellán o al responder directamente n'asturianu. Estes baxes puntuaciones nes prebes sicométriques acaben empobinando bien de vegaes a los neños a los grupos d'educación especial



De momentu, Xosé Arturu Bermeyu García y Dulce Mª Gil
denunciaron el problema énte l'Academia de la Llingua,
l'Asociación Internacional pa la Defensa de les Llingües y Cultures
Amenazaes y tamién énte la Oficina Europea pa les Llingües.
Los padres yá metieren el 1 de setiembre un escritu en rexistru de la
Conseyería de Cultura denunciando la situación y
encontándose nuna riestra de lleis y alcuerdos internacionales pa
defender el derechu a recibir enseñanza n'asturianu. Ente los testos nos
que s'atecha la familia pa defender el so derechu rescamplen la carta de los
derechos humanos y, yá no concreto, l'artículu 3 de la Llei d'Usu
del asturianu qu'apauta la escolarización del asturianu y el 4 del
estatutu d'autonomía. Esti escritu, en que piden una entrevista col conseyeru Riopedre, entovía nun tien
empuesta.