Nuevu conciertu del programa Folk de Cámara

Xiblata, curdión y bouzouki van ser los protagonistes esti vienres
na casa natal de Xovellanos de Xixón.



Los músicos que van tocar estos instrumentos van ser Xuan Nel
Expósito col curdión, Borja Baragaño na xiblata y Alberto
Ablanedo col bouzouki. Xuan Nel ye un conocíu músicu asturianu,
investigador del curdión tradicional asturianu y que dende va bien
d'años desenvuelve l'actividá de docente pa esparder el
conocimientu del curdión asturianu. Trabayó con colectivos
d'investigación etnográfica (L'Andecha Folclor) y grupos folk
asturianos (Boides, Llan de Cubel), uniéndose a "Felpeyu" en
1994, grupu col que desarrolla'l so principal llabor como curdioneru.



Borja Baragaño entama cola flauta de madera pel añu 1998.
Como otros xiblateros asturianos, ye
un
gaiteru percualificáu, capaz de treslladar les técniques de
la gaita asturiana a la xiblata de madera. Amás de collaborar cola
cantante Esther Fonseca, trabaya dende l'añu 2000 col grupu
"Llangres", del que ye gaiteru
y xiblateru.



Alberto Ablanedo pertenez a la segunda fornada de
bouzoukeros asturianos, entamando
con esti instrumentu en 1996. Dende entós nun perdió'l tiempu:
tuvo presente en delles formaciones como "Dubram" -yá disuelta-,
"Brenga Astur" o "Los Gatos del Fornu", y anguaño
trabaya col grupu "Bron", amás de pasar a reforzar la
formación d¹otru grupu asturianu "Llangres" el
pasáu 2002.



Nel repertoriu d'esti conciertu vamos dir alcontrándonos con
temes de la tradición asturiana. Dalgunos d'estos temes salen del
repertoriu de grupos folk a los que pertenecen los músicos,
"L´Ablanera" (trad/Í.Medio), "Xota
Caldueñu" (trad) o "De La Vega pa Noruega" (B.
Baragaño) son dalgunos exemplos. Lo interesante va tar en sentir esos
temes igüaos de forma distinta a l'habitual xunto con otros temes nun tan
conocíos como Sora Xuana (trad/X. N. Expósito), Dancia de La
Villa de Mieres (trad/X. N. Expósito) o Alborada de Rimsky.



La hora del conciertu y el llugar ye l'habitual, les 19:30 hores na casa
natal de Xovellanos de Xixón esti vienres 21.