Nueve alcaldes del occidente reclamen programación en gallego-asturiano na TPA

Los alcaldes de nueve conceyos del occidente del país mostraron el so sofitu a un comunicáu de l'Asociación Cultural Xeira. Nél, el coleutivu reclama a la RTPA la emisión de programes en gallego-asturiano na televisión pública.
 
Nel comunicáu Xeira esplica que “falóu a lo llargo del ano pasao cos alcaldes” de los conceyos del occidente “pra feryes chegar a nosa preocupación sobre esta carencia”. Asina, consensuó un comunicáu “unde se recoye ese sentir pra que lo apoyaran os alcaldes que lo visen ben. Despóis d'esos contactos, manifestáronnos el sou apoyo el alcaldesa d'El Franco y os alcaldes de Navia, A Veiga, Taramunde, Samartín, Santalla, Pezós, Eilao y Grandas”.
 
El testu esplica que “as noticias recurrentes sobre el interés da Televisión de Galicia por chegar cuas súas emisióis en gallego al estremo occidental asturiano fain destacar a falta d'úa programación propia, da mao da TPA –a televisión de todos os asturianos–, que recoya a realidá llingüística del estremo occidental d'Asturias”. Amás, Xeira demanda que la TPA debía defender la llingua de la zona “como elemento cohesionador da nosa identidá como asturianos y, pra nosoutros, el gallego-asturiano, a nosa fala, forma parte mui importante da nosa personalidá como asturianos y asturianas del occidente”.