Nel día mundial de la capa d'ozonu

Por disposición de la ONU, el 16 de
setiembre ye'l día mundial de la Capa d'Ozonu, fecha que
s'instituyó en 1994 n'alcordanza de la firma del Protocolu de Montreal
en 1.987. Daquella, 175 países comprometiéronse a meté-y
tixera a les emisiones que dañaben la capa d'ozono, y el mundu
sintió falar por primer vegada d'un furacu que, d'entós
p'acá, anque non de manera constante, nun fizo más qu'enanchar.




Anque dacuando se venceyó la imaxe del ozonu cola d'un gas velenosu (y de fecho yelo)
la presencia d'una capa d'ello nes partes más altes de
l'atmósfera guarda a la tierra d'un escesu de radiación solar que
ta ente les causes del aumentu del cáncanu a la piel, consecuencia más directa pa los humanos de la falta d'ozonu na parte alta de l'atmósfera. L'alarma del ozonu
disparárese diez años primero, en 1.977, cuando un grupu
d'investigadores de la Universidá de California atoparon que la
radiación solar xubía n'Antártida mientres la capa d'ozonu
endelgazaba escandalósamente.

La contaminación causao polos nomaos CFC's ye l'axente que más daña la capa d'ozonu, y contra la emisión masivo d'estos gases foi que se firmó'l protocolu de Montreal, del que la ONU diz, 16 años depués, que foi un ésitu. Según la ONU, los niveles de CFC's n'atmósfera tan llegando agora a un másimu del que yá nun van facer otro que baxar, permitiendo que l'ozonu se recupere. Sicasí, esti añu el furacu na capa d'ozonu tien unes dimensiones aprosimaes a les del añu 2.000, en que llegó al másimu. Los espertos dicen que, en casu de que too pinte bien, el furacu entovía va tardar sobre 50 años en pesllar.