Nel día de la muyer

Celébrase güei el Día Internacional de la muyer trabayadora, fecha que fai alcordanza de la muerte de 146 obreres d'una fábrica en Nueva York en 1908 depués de que la policía atacare con bombes incendiaries el aller onde taben trancaes en fuelga. Esti añu, la ONU dedíca-y la fecha a la situación de les muyeres n'Afganistán, anque'l tema de la discriminación social y llaboral son los que que marquen equí'l discursu de la xornada, na que van celebrase concentraciones na Plaza d'España n'Avilés y na Plaza'l Parchís de Xixón.

La Xunta Xeneral del Principáu aprebó esta mañana, por unanimidá, un documentu que se centra na igualdá de tratu y oportunidaes. El testu consensuáu ente los trés grupos con representación na cámara asturiana pide un avance pa que los homes y les muyeres tengan les mesmes posibilidaes y la mesma consideración" y reconoz que "la discriminación en razón del sexu ye una realidá" y que "les muyeres qu'acceden a puestos de trabayu tan infravaloraes". La declaración de la Xunta vien a facese nel mesmu mes en que la baxada del paru n'Asturies benefició namás a los solicitantes d'emplegu masculinos, mientres que'l paru ente les muyeres del país xubió y representa'l 60% de la masa de desemplegaos, con 35.094 muyeres apuntaes a la llista de demandantes de puestu de trabayu. D'otra manera l'Institutu Asturianu de la Muyer, que celebra l'actu institucional en Samartín del Rei Aurelio va centrar el discursu na cuestión de la prostitución y el tráficu de persones con fines sexuales. Los actos institucionales del Institutu van seguir a lo llargo d'esti mes con un foru sobre prostitución y abusos que va celebrase'l 19 y 20 de marzu en Xixón y un ciclu de charrres entitulaes "Muyer y deporte" que van dase n'institutos de secundaria.

Dellos enllaces: Mujeres en la red, web especial de la ONU, Amnistía Internacional Comunicáu conxuntu d'UXT y CCOO