Naz un proyeutu col envís d'averar la realidá social y cultural del país a la población d'Euskal Herria

|

‘Ixuxú Asturies-Euskal Herria elkartea’ ye’l nome d’un proyeutu sociocultural que pretende mostrar la realidá asturiana n’Euskal Herria. Pa ello va promocionar la música del país y entamar eventos y actividaes sociales nel territoriu vascu.

Una páxina web va servir de nucleu d’una iniciativa que va dir más allá de la rede y que se define como “un glayíu intercultural pa visibilizar aspectos d’Asturies, tantes vegaes invisibilizada y estereotipada”. Asina, ‘Ixuxú Asturies-Euskal Herria elkartea’ va centrase na estaya cultural, sobre manera na música, y nes temátiques sociales, como la historia, la socioloxía o los movimientos ciudadanos. No que se refier a lo musical, un pegoyu perimportante del proyeutu, pretende sirvir de plataforma de bandes y artistes asturianos, cubriendo “les carencies que tien la infraestructura musical asturiana pa espardese per fuera’l país”. Asina, la “promoción de grupos, organización d’eventos, venta online, distribución, management y contratación, programación d’actividaes sociales o realización de talleres, son dalgunes de les actividaes qu’Ixuxú Asturies-Euskal Herria elkartea va desendolcar p’algamar los sos oxetivos de da-y puxu a la cultura, a la música y a aspectos sociales d’Asturies fuera de les llendes asturianes”, según señala Xicu Ariza, ex redautor d’Asturies.com residente anguaño n’Euskal Herria y responsable del proyeutu.

La primer iniciativa que pon en marcha ‘Ixuxú Asturies-Euskal Herria elkartea’ ye la promoción del discu ‘Mezigayuska’ de La Tarrancha en territoriu vascu y l’apertura d’una tienda online onde tán disponibles trabayos de formaciones d’estilos diversos como Sambre, Pandereteres de Fitoria, Anabel Santiago, Dixebra, Héctor Braga, el Grupu de Baille Tradicional San Félix o La Col.la Propinde, ente otros. Amás, pal 2 de marzu, va entamar un alcuentru astur-vascu nel Gaztetxe de Gasteiz, cola collaboración del Centru Social Autoxestionáu La Semiente, con charres, pasucais, mercadín de coleutivos sociales asturianos y un conciertu. Tamién ta prevista la ellaboración d’un dossier que recopile grupos de música, actividaes culturales y sociales cola fin de presentalu y ufiertalu peles bayuroses infraestructures culturales vasques.

D’esta forma, y siguiendo esta llinia de trabayu, el proyeutu d’Ariza espera “francer los estereotipos y el desconocimientu xeneralizáu qu’hai de la realidá sociocultural asturiana” n’Euskal Herria al mesmu tiempu que busca “estrechar llazos y fomentar la interculturalidá”. Una manera de dignificar el país pese a tar lloñe de la tierra.

 

Contador Estadistiques