N’Arba, Corquiéu o Skama la Rede tamién van tar nel XXX Conciertu pola Oficialidá

|
Cartelu XXX Conciertu pola Oficialidá

El XXX Conciertu pola Oficialidá, que repite’l 6 d’ochobre otru añu nel xixonés Parque Inglés, yá tien cartelu definitivu. A los nomes de Dixebra, Tejedor y La Tarrancha súmense los de N’Arba, Corquiéu, Skama la Rede, Ún de Grao y L-R.

Nuna edición tán especial como ésta, la trenta, y nun momentu tan importante pal asturianu, cola oficialidá incluyida na axenda política nacional a menos d’un añu de les eleiciones a la Xunta Xeneral, la Xunta pola Defensa de la Llingua Asturiana (XDLA) prepara una Conciertu pola Oficialidá de primer nivel. Asina, va axuntar nel Parque Inglés –anguaño nomáu Parque de los Hermanos Castro– a ocho de los meyores nomes de la escena musical n’asturianu que, al igual siempre, actúen de manera desinteresada nesta cita retrasada a la seronda esti añu por mor de la convocatoria de la masiva manifestación 'L'asturianu llingua oficial ¡agora! del 21 d’abril.

Pa facer más áxil el cambiu ente grupu y grupu, la organización va instalar dos escenarios, que lleven el nome de ‘Yá’ y ‘Agora’. Nel primeru van tocar Ún de Grao, Corquiéu, N’Arba y Dixebra, mentes que nel segundu van xubir L-R, Tejedor, Skama la Rede y La Tarrancha.

Un amiestu d’estilos, que van dende la tonada al rock, pasando pel folk y el ska, pa completar más d’ocho hores de música n’asturianu. El preciu de les entraes va ser de 8 euros de manera anticipada y de 10, na puerta, y pronto van poder mercase nos siguientes puntos de venta: Trisquel y Canteli, en Xixón;  L’Esperteyu y Mala Strana, n’Uviéu; El Cafetón, n’Avilés; L’Abellugu, en Mieres; La Palmera, en La Pola Ḷḷena; CSA La Semiente, en L’Entregu; Creisi, en Candás; El Cuévano, en La Pola Siero; Llibrería Las Dos Vías, en Grau; y l’Azul, en Cangas.

Contador Estadistiques