N’Ast va celebrar un aconceyamientu abiertu na Llibrería Paraxuga

L’Asociación Cultural N’Ast convoca pa esti miércoles un aconceyamientu abiertu n’Uviéu. La cita ta prevista pa les 20 hores na Llibrería Paraxuga y el coleutivu convida a los sos simpatizantes a participar nél.
 
L’orde del día d’esti aconceyamientu va tratar, nesti orde, temes d’organización; les campañes n’activu, como’l voluntariáu llingüísticu, la esposición de cartelos o ‘Vivir n’ast’; propuestes pa entamar campañes nueves; distribución de material; y ruegos y entrugues. La Llibrería Paraxuga d’Uviéu, na cai Paraísu númberu 2 d’Uviéu, ye’l llugar escoyíu pa la reunión.
 
Otra manera, N’Ast vien de denunciar lo que califiquen de casu nuevu d’especulación urbanística n’Asturies, en concreto en Cimavilla. La construcción d’un aparcamientu soterráu na parte alta del barriu xixonés nuna “zona onde esisten dellos restos arqueolóxicos que van sufrir cuandu menos una seria erosión” poles obres ye refugáu por esti coleutivu. “Nel Estáu español tenemos múltiples exemplos de cómo la costrucción d’un parking soterrañu implica la destrucción de patrimoniu hestóricu ensin que la ciudadanía tea debidamente informao. Asina, en N’Ast nun podemos callar énte les consecuencies que supon qu’una vuelta más la ciudá de Xixón inore la so hestoria como espaciu societariu pa optar polos modelos d’organización espacial dominantes nel Estáu”, señalen.