Música y teatru en Xixón con Toli Morilla

El cantautor asturianu Toli Morilla presenta esta nueche a les 20:30 hores nel Teatru Xovellanos de Xixón el so últimu discu con un espectáculu músicu-teatral.

"Nueche d'insomniu" del que yá falamos nesta sección la selmana pasada, ye l'últimu trabayu discográficu de Toli Morilla editáu por "Dusty Roses". Pa presentar esti discu al públicu Toli Morilla escoyó'l teatru Xovellanos de Xixón, onde va desenvolver un espectáculu qu'amiesta música y teatru dirixíu por José A. Lobato. Nel espectáculu, amás de poder sentir los cantares d'esta "Nueche d'insomniu", tamién vamos poder escuchar les voces de dellos poetes que ficieron les lletres pal discu, ente ellos María Teresa González, Teresa Lorences, Rosa Taurán, Xulio Vixil, Manfer de la Llera, Xandru Fernández y Antón García, acompañaos pola interpretación d'actores y actrices. Tamién va haber una narración dramatizada d'un testu del propiu cantautor nel que cuenta la so esperiencia a la hora de componer y escribir un cantar n'Asturies.