Mus actua n'Uviéu mañana xueves

"Mus" son una pareya musical que col asturianu como idioma de les sos lletres, desenvuelven un discursu musical bien estremáu de les corrientes comerciales . Con esti estilu consiguieron llegar un públicu fiel que colos años afitó a los xixoneses nuna posición privilexada na escena de la música independiente. Estremaos de la corriente principal que manda nel mercáu discográficu, Mus tampoco tienen nengún otru grupu que se-yos asemeye n'asturies, siendo una de les poques aportaciones al pop en llingua asturiana, un idioma que sigue ensin tener munchu predicamentu fuera de dellos xéneros musicales mui concretos.

El conciertu de mañana, nel que Mus van presentar el so nuevu discu de llarga duración "Divina Lluz" va ser nel Centru Cultural Caxastur d'Uviéu a les 20:30, dientro del Festival Intersecciones qu'organiza la entidá bancaria asturiana. La entrada pa esti conciertu ye de baldre, lo qu'afala a asistir a una de les poques ocasiones en que Mus se dexen ver pela so tierra. Podría incluso dicise que'l conciertu de mañana ye una oportunidá pa qu'entame a saldase una delda pendiente ente'l grupu y el públicu asturianu, y ye que los mesmos Mus tienen pa ellos qu'entovía-yos falta algamar el reconocimientu que tienen nel estranxeru nel so propiu país.

Un exemplu d'esto ye que la banda lleva tantos conciertos na so historia n'Asturies como en Taiwan, concretamente dos contando'l d'esti xueves. Precisamente de Taiwan ye d'onde ta acabante de volver el grupu dempués de facer una pequeña xira con dos conciertos. "Mus" valora positivamente la esperiencia, sobre too pola rempuesta del públicu, que pudo sentir l'asturianu na voz de Mónica Vacas, miembru del dúu xunta Fran Gayo, en dos conciertos, ún d'ellos na sala de conciertos más importante de Taipei, la capital taiwanesa.