Multes y esixencies económiques del Conceyu d’Uviéu a la XDLA pol 16-O: “nun nos van callar”, aseguren

|
Multa a la XDLA cartelos 16-O

Cuatro militantes de la Xunta pola Defensa de la Llingua Asturiana (XDLA) tán acabante recibir una multa del Conceyu d'Uviéu por apegar cartelos “por la ‘OFICIALIDÁ’” p’anunciar la manifestación del 16-O. L'Ayuntamientu yá esixera enantes una fianza de 13.500 euros pa poder instalar l’escenariu nesa histórica xornada reivindicativa.

La notificación de la multa marca una infracción de la Ordenanza de Llimpieza por apegar cartelos en zones non autorizaes, en concreto na cai Vázquez de Mella númberu 35, reflexando los axentes de la Policía Llocal que la patrulla que llevantó acta viera otros en “Las Campas y La Florida” –la única forma oficial ye’l topónimu tradicional ‘Les Campes’–. “Ésa ye la trampa del sistema pa los movimientos sociales: namás pues apegar cartelos en sitios autorizaos…, pero nun tenemos sitios autorizaos p'apegar cartelos, asina que ye meyor que nun anuncies nada porque si non ponémoste una multa”, apunta la XDLA.

Esta “presión económica” nun ye nueva pa esta organización, que yá s’atopó con un gran problema dos díes enantes de la manifestación qu’anunciaben esos cartelos. Nesi momentu’l Conceyu esixó 13.500 euros como fianza, por posibles daños nel pavimentu, pa permitir l’accesu a la plaza de la Catedral de vehículos pesaos pa la instalación del escenariu nel que se lleó’l manifiestu, punxo la so música Fruela 757 y dio un conciertín Rodrigo Cuevas, una cantidá escomanada pa un coleutivu como la XDLA, “pero nun podíemos suspendelo too, asina que tuvimos qu'encarar la fianza con aportaciones particulares nuestres pa que la manifestación pudiera acabar como queríemos”.

"Nun nos van callar", rescamplen al tiempu qu'esponen que “pa una asociación como la XDLA, que basa la so independencia nel trabayu desinteresáu de los sos militantes y nes aportaciones económiques de la xente que ye socio, situaciones como estes suponen un problema evidente, pero tamién nos convencen de que'l nuestru llabor ye más necesariu que nunca. Somos independientes y naide va callanos, pero convién nun escaecer la importancia de la independencia económica pa poder siguir na llucha polos nuestros derechos”.

Contador Estadistiques