Muerre Manolo del Campo, destacáu emigrante asturianu n'Arxentina

Manolo del Campo, emigrante asturianu n'Arxentina y fundador del grupu folklóricu "Pelayo" de Bonos Aires, morrió ayeri na clínica del Centru Asturianu na capital arxentina.

Manolo del Campo, natural de Pría (Llanes), coló pa l'Arxentina en 1949, convertiéndose bien llueu nun de los más activos representantes d'Asturies na capital del Plata. Defensor de los derechos de la comunidá asturiana nel esterior, Del Campo algamó distingos como la Orde del Méritu Civil y la medalla de Plata del Principáu

Xunta la llucha nestos años últimos de crisis económica por meyorar les prestaciones asistenciales a los emigrantes asturianos n'Arxentina, na so trayectoria de trabayu rescampla la creación del Grupu folklóricu Pelayo, la entidá cultural y musical más importante d'América del Sur y guañu tamién d'iniciatives musicales que caltienen vivu'l contactu ente l'Asturies peninsular y la esterior, casu del grupu folk Fardaxu. Xunta esto, Manolo del Campo foi ún de los qu'echaron p'alantre la creación de la Escuela d'Asturianía, iniciativa entamada col Conseyu de Comunidaes Asturianes que-yos permite que los emigrantes asturianos de segunda y tercer xeneración allegase a la cultura del país. Precisamente nel pieslle del cursu del añu pasáu d'esta Escuela foi la última vez que la redacción d'Asturies.com tuvimos en persona con elli. Va'l pésame nuestru pa la so familia y pal Centru Asturianu de Bonos Aires.