Montañés va defender el títulu de campeón del Tenis-playa de Lluanco

El campeón del Torneo Banco Herrero-Tenis-playa de Lluanco-Trofeo Juan Avendaño del 2011, Albert Montañés, confirmó a la organización la so participación na edición d’esti añu. Ésta va celebrase ente’l 30 de xunetu y el 2 d’agostu.

L’actual númberu 52 del mundu va repetir presencia nel tornéu que se xuega sobre’l sable de la playa La Ribera dende hai 33 años tres el so debú espectacular na edición pasada. Nella, llevóse la gran final ante’l veteranu Carlos Moyà por 1-6, 6-3 y 6-2 nuna hora y 13 minutos de xuegu.

Montañés ye’l primer xugador confirmáu de los seis que van participar nesta competición espectacular, única nel mundu, qu’esti añu va disputase na modalidá ‘round robin’, esto ye, con dos grupos de trés tenistes en formatu de lliga. Los campeones de cada grupu enfrentaránse na final.

El de Sant Carles de la Ràpita algamó esta temporada los cuartos de final en Viña del Mar y tien como otros grandes ésitos cinco ATP World Tour 250, toos ellos en tierra batida: Amersfoort (2008), Estoril y Bucarest (2009), y Estoril y Stuttgart (2010). L’añu pasáu foi campeón estatal absolutu.