Millones en propaganda

Les campañes publicitaries del Gobiernu d'Asturies costáronnos l'añu pasáu más de 6 millones d'euros, según denunciaron tolos grupos de la oposición nel Parlamentu Asturianu. Los tres partíos na oposición, PP, IX y URAS, nun dan esactamente los mesmos números, pero concueyen en dicir que l'executivu gastó l'añu pasáu un presupuestu descomanáu n'acciones publicitaries que nun se sabe mui bien si sirvieron de promoción del país o del mesmu gobiernu, llegando a calificales como operaciones pa vendé-y a la población la figura d'Areces. Nesti sentíu, IX pidió un proyectu de llei que regulase la publicidá institucional, una iniciativa que votó en contra'l PSOE. La coalición d'izquierda tamién denunció que col repartu de les perres pa propaganda institucional puede tar faciéndose una subvención atapecía a dellos medios de comunicación.Tamién llama l'atención el que bien de campañes de propaganda acaben llevándoles empreses que nun son asturianes. Ye'l casu de Bassat Ogilvy, que ganó l'añu pasáu un contratu de 42 millones de pesetes o del Grupu Leader, una empresa con sé en Madrid qu'acabó abriendo oficina n'Uviéu p'atender tolos negocios que-y salíen equí.