Miguel Rodríguez Monteavaro va beneficiase de la residencia lliteraria n’A Coruña

|
Miguel Rodríguez Monteavaro

El proyeutu presentáu por Miguel Rodríguez Monteavaro foi’l meyor valoráu pola comisión de la ‘Beca Asturies de Lliteratura Asturiana en Residencia’, polo que l’autor de Bual va disfrutar de la estancia d’un mes na Residencia Literaria 1863, asitiada n’A Coruña. Va disponer de tol mes d’avientu pa desendolcar el so llabor lliterariu.

La comisión de valoración tuvo formada por Xuan Bello, Marta Mori y Laura Marcos, coordinaos pola poeta gallega Yolanda Castaño, impulsora de la Residencia Literaria 1863, un apartamentu marineru del sieglu XIX con vistes al mar cerca del centru de la ciudá. Rescamplaron “la calidá y rigor de la propuesta, la trayectoria del candidatu y l’interés del so proyectu interdisciplinar”.

Amás, consideró esta esperiencia “un apueste por un ecollingüismu real que favoreza l’intercambio ente les comunidaes creadores d’Asturies y Galicia”. Rodríguez Monteavaro toma’l relevu de la madrilana Mercedes Cebrián, ganadora de la I Residencia Cidade da Coruña para Escritores/as Españoles, agospiada ellí esti mes de payares, y d’autores de Filipines, República Dominicana, Bolivia, Países Baxos, Finlandía, Estaos Xuníos o Xeorxa, siendo’l primeru en disfrutar d’esti apartamentu del 1863 y de la esperiencia’l popular poeta chilenu Raúl Zurita.

L’autor y músicu del occidente, llicenciáu en Filoloxía Hispánica y anguaño estudiante de doctoráu na Universidá d’Uviéu, onde ye investigador nel campu de la dialectografía y dialectometría, va disfrutar d’una asignación pa gastos personales y de la oportunidad d’integrarse na comunidá artística de la ciudá con invitaciones a actividaes culturales de tou tipo mientres desendolca’l so proyeutu lliterariu. La ‘Beca Asturies de Lliteratura Asturiana en Residencia’ naz d’un alcuerdu ente la Conseyería de Cultura, Política Llingüística y Turismu, y la Residencia Literaria 1863, primeru d’esti tipu robláu por Castaño con un territoriu del Estáu.

Semeya obra de Xosé Antón Fernández 'Ambás'.

Contador Estadistiques