Mieres y Ribeseya entamen folixes con protagonismu pa la música y la sidra

Celébrense'l X Ochobre Folk, cola presencia d'Algaire y Caldo & Os Rabizos, y la Folixa la Sidre, con Llan de Cubel y La Tarrancha.

Esta fin de selmana Mieres y Ribeseya concentren dos de los planes más atractivos del país, cola música tradicional y la sidra como protagonistes. El Grupu Folclóricu Prau Llerón y Entaína Ribeseya son los coleutivos responsables, de manera respeutiva, de la so organización.

Na cuenca d'El Caudal, nel Parque Xovellanos, van entamase delles charres y talleres, actividaes infantiles y conciertos. Un alcuentru de bandines, a les 20 hores, y una espicha popular va preceder a la Nueche en Danza prevista pa esta medianueche, mentes que mañana va actuar dende les 19 hores la Orquestina La Xarangana, Abéu, Caldo y Os Rabizos –en sustitución de Pandereteros d'Anguaño–, Algaire y Llevólu'l Sumiciu.

Alicia Álvarez, col so 'Kikirikikí', va animar la mañana del domingu a la reciella dende les 13 hores y, al empar, dende les 12.30 hores, Los Gascones van llevar la so música peles cais de Mieres.

Na Plaza Nueva

La Folixa la Sidre de Ribeseya, que se vio obligada a treslladar a última hora tola actividá a la Plaza Nueva, va abrir la carpa esta tarde a les 19.30 hores, onde Inaciu Galán va encargase de lleer el pregón a les 21.30 hores. Darréu, va haber un conciertu d'Avalle Van y una pinchada de Basi.

Mañana va tener llugar el III Concursu de Gaiteros/es Solistes Gelu Cuervo a les 11 hores y el VIII Festival de Bandes de Gaites Memorial Hugo y Puru a les 19 hores, cola participación d'El Gumial, Noega y Ribeseya. Nel vermú, a les 14 hores, va actuar 6 Riales, y yá de nueche, van tocar Llan de Cubel (22 hores) y La Tarrancha (00 hores), pesllando la folixa'l DJ Avante'l Pueblu (1.15 hores).

Na xornada'l final, el domingu, va celebrase'l VII Concursu de Sidre Casero (12 hores) y el Concursu d'Escanciadores (17 hores). La nota musical va ponela, a les 13 hores, La Xarangana.