Microsoft da'l codigu fonte del Windows

Xunta la fórmula de la Coca-Cola, el códigu fonte del sistema operativu de Microsoft ye ún de los secretos industriales meyor guardaos de la historia. Anque parecía que diba seguir embaxo d'ochenta candaos hasta la fin de los tiempos, la casa de Redmond diz agora que va dar a conocer les llinies de programación que son l'alma del sistema que más usuarios tien en mundu. El Financial Times, que destapó la noticia, diz que la casa de Bill Gates llegó a esti determín depués de ver que'l sistema operativu Linux, de códigu abiertu, ta comiéndo-y el tarrén y ta quitándo-y a los sos clientes más importantes, como son gobiernos y alministraciones. Énte'l Windows, Linux sal muncho más barato al nun pagar les millonaries llicencies que pide Microsoft y, al ser de códigu abiertu, cualquier programador pue caciplar nelli p'adaptalu a les necesidaes que se tengan. Asina que p'atayar al rival, a Microsoft nun-y queda más remediu que copiar los sos métodos y espublizar el códigu fonte, pero ello tampoco va ser de baldre: en cuenta de ser de públicu accesu como en Linux, les vidayes de Windows namás van poder conoceles que gobiernos y empreses de confianza de Microsoft, ente ellos Rusia y la OTAN, que parez que yá recibieron la información.