Meyora de les esportaciones asturianes

Les esportaciones asturianes del añu pasáu rescamplen nes estadístiques económiques estatales. Les ventes de les empreses asturianes nel extranxeru algamaron los 1.280 millones d´euros nel 2002, un 17% más que nel 2001. Esta medria pon a Asturies como cabezalera xunto a Murcia ente les autonomíes onde les exportaciones crecieron más según el Boletín de Comerciu Esterior de les Cámeres de Comerciu. Tamién foi positivo p´Asturies la reducción nel déficit comercial, que baxó más del 25% respeutu al 2001.

Alemaña, Portugal, Francia y Italia son los paises onde s'unvien les más de les exportaciones astures. Tamién Holanda, Reinu Xuníu, Bélxica y los Estaos Xuníos son llugares onde los productos fechos n´Asturies tan entrando con fuercia. En conxuntu, los países de la Xunión Europea reciben el 67% de toles esportaciones asturianes.

Les empreses qu´esporten penriba de cientos de miles d´euros son les de sector siderúrxicu y metalúrxicu, casos d'Aceralia, Thyssen o Trefilería Moreda, toes elles enxertes en grupos multinacionales o estatales. Ensin llegar al volume d'estes, y yá en sectores más diversificaos tan Linpac Plastics Pravia, Cerámica del Nalón, Valle Ballina y Fernández, Asturiana Galvanizadora, Rioglass Astur, Naval Xixón y Mantequeríes Tinéu. Xunta productos siderúrxicos tamién destaquen el sector químicu, alimentación y maquinaria. En total, so 87 les empreses asturianes qu'apaecen nel nuevu directoriu d´empreses esportadores y importadores fechu poles Cámares de Comerciu y l´Axencia Tributaria. D'elles 17 esporten por un volume superior al millón d´euros, 26 ente 100.000 euros y un millón d´euros y les 44 que falten menos de 100.000 euros.