Meléndez quita de males maneres la bandera d’Asturies a Juan Muñiz na celebración del Européu sub-19

|

El téunicu de la seleición española sub-19, Ginés Meléndez, tuvo un xestu mui feu col sportinguista Juan Muñiz na celebración del Européu. Quitó-y de males maneres la bandera d’Asturies mentes dexó a otros xugadores llevar la d’España.
 
L’aición tuvo llugar tres el trunfu na prórroga de la seleición española frente a la República Checa por 3-2, partíu nel que tomó parte’l centrocampista Juan Muñiz tres sustituyir nel minutu 77 a ún de los refuerzos del Getafe pa esta temporada, Sarabia. Na celebración, el sportinguista garró una bandera d’Asturies que-y dio la so ma dende la grada de les instalaciones del Rapid de Bucarest momentos enantes de recibir el troféu. Meléndez, al ver la presencia del símbolu asturianu, corrió a quitala ante la sorpresa del xugador y compañeros. Mentes, otros dos xugadores sí pudieron llucir banderes, nesti casu d’España. Ún d’ellos, el madridista Morata, llevaba una bandera con un güe.
 
Los comentaristes de Cuatro, cadena que televisó’l choque en direutu, nun-y dieron importancia a l’aición que sí tuvo repercusión na rede. La mayor parte de los medios de comunicación, a esceición del programa ‘Futboleros’ de MarcaTV, principiaron a informar d’esta polémica esta mañana pol ecu que tuvo n’Internet, sobre manera nes redes sociales. Asina, Gines Meléndez llegó a ser ‘trending topic’ a nivel mundial en Twitter. Juan Muñiz, en declaraciones a los medios, dixo que nun había nenguna indicación de nun sacar banderes distintes a la española y que l’asuntu quedó iguáu nel vestuariu. Hai que recordar que'l téunicu albaceteñu yera entrenador de la seleición española ganadora de los Xuegos del Mediterraneu nel 2005 na que pudo vese al xugador actual del Getafe Arizmendi celebrando'l títulu con una bandera d'España preconstitucional, lo que tamién llevantó polémica nel so día.
 
No deportivo, el centrocampista del Sporting B tuvo una actuación más que destacada nel Européu sub-19 de Rumanía pese a nun ser titular. El xixonés marcó un tantu de bella factura nel primer partíu contra Bélxica y dexo muestres de la calidá que guarda na so pierna izquierda. La bona actuación del xixonés pue provocar la llamada de Manuel Preciado pa que s’incorpore al primer equipu de manera definitiva y pelee por un puestu na banda izquierda con Ayoze pa cubrir la marcha de Diego Castro. La opción deseada pol téunicu del Astillero y Emilio de Dios pa sustuyir al pontevedrés, el sevillista Armenteros, quedó descartada tres la decisión de Marcelino de que l’arxentín se quede na plantiya del equipu de Nervión.

Contador Estadistiques