Medra la inversión en capital riesgu

Les sociedaes de capital riesgu tovieron un bon entamu d´añu no que se refier a les inversiones dientro l'Estáu Español. De fechu, les inversiones en capital riesgu medraron penriba´l 25% nel primer semestre d´esti añu 2003, algamando inversiones por valor de 415 millones d´euros, en comparanza colos 330 millones d´euros del mesmu periodu nel 2002. Anguaño la tendencia ye que los directivos de les medianes y grandes empreses seyan los qu'utilicen la fórmula de financiación de capital riesgu para mercar la propia empresa onde trabayen. Esta modalidá ye'l MBO (management buy-out) y ya supón el 25% de toles operaciones de capital riesgu. L´Estáu Español asitiase na sétima plaza del ranking européu d´inversiones tres del Reinu Xuníu, Francia, Alemaña, Italia, Suecia y Holanda. Amás nesti añu entraron doce nueves sociedaes de capital riesgu a invertir nel territoriu español. Les razones principales del interés de los inversores internacionales en invertir en capital riesgu n'España son les bones perspectives de crecimientu, la estabilidá macroeconómica, la importante cantidá d´empreses familiares, l´abondancia de perres y los procesos de desinversión nes grandes empreses. Otramiente, l'añu 2002 foi el meyor añu pal capital riesgu européu con una inversión de 27.000 millones d´euros lo que supón una xuba del 14%.

El capital riesgu ye una ferramienta d´inversión pola que se-y da sofitu a les empreses para entamar procesos d´espansión y crecimientu. N´ Asturies destaca la sociedá de capital riesgu de calter públicu SODECO, que tien l'oxetivu d´ayudar na reindustrialización de les comarques mineres. Asinamesmo, tamién esiste Inverasturias, sociedá con sé en Avilés y xestionada pol bancu ING Barings. Una de les más importantes operaciones de capital riesgu del primer semestre del añu n'España, y que afecta, y muncho, a Asturies foi la privatización d´ENA propietaria de l´Autopista del Val.le Güerna, operación na que participó la sociedá de capital riesgu inversor Torreal.