Mayu entama con perdes

Perdes nes bolses nuna selmana marcada pol tonu festivu del Primeru de Mayu, Díi de los Trabayadores. La Bolsa de Madrid peslló la semana pasada con perdes, a la contra del restu de les places europees, que xubieron. El parqué madrilanu trancó'l xueves pol Díi del Trabayu, y el vienres tampoco abrió por ser fiesta na Comunidá Autómona de Madrid. El pocu volume de negociu continuó nel parqué madrilanu col entamu del nuevu mes. El selectivu Ibex asistiose nos 6.456,4 puntos.



Ente les estadístiques selmanales internacionales destacar l'ISM de xestores de compra d´Estaos Xuníos que baxó más de 50 puntos, lo que quier dicir que los profesionales encargaos de facer les compres nes empreses cuenten con una desaceleración económica nos prósimos meses. Mal datu tamién al otru llau del Atlánticu con una xuba del índiz del paru con una tasa del 6% frente´l 5,9% esperáu polos analistes. N´Alemaña la estadística de ventes al por menor nun pudo ser peor al tener una cayida del 3% mentantu los analistes contaben con un suave -0,7%. Estos datos siguen la llínia de meses anteriores en que la economía nun ufierta namai que duldes. Estaos Xuníos nun acaba de pasar los malos resultaos empresariales asina como'l coste d´una guerra que nun se sabe como va pagar. Otramiente, la locomotora alemana nun acaba de medrar, colo que peligren les perspectives de crecimientu económicu nel Vieyu Continente.



Na Bolsa de Madrid les ventes despidieron la selmana pasada. L´Ibex tuvo una baxada semanal del 1,08%, colo que se manga nos 6.456,4 enteros. Mentantu que los grandes bancos BBVA y SCH nun terminaron la selmana con ganancies, la estrella foi Sogecable que tuvo una xuba perimportante. Otros valores victoriosos foron Zelta y Endesa con xubes penriba'l 2%. Nel terrén de les cayíes destaca Ferrovial con perdes del 2,52% poles sobrecompres de les últimes selmanes al ser valor d'abellugu. El grupu Telefónica nun tuvo una bona selmana, con cayíes penriba del 1,5% pela parte de la matriz. Iberia llegó a tener perdes del 5% a cuenta de qu'anda ruxéndose que'l presidente Xabier de Irala pue dexar la empresa, y ye que según dellos confidenciales Xabier de Irala tien acutáu el sillón de presidencia de la entidá financiera vasca BBK.


Namás Llondres y Nueva York festeyaron el Díi del Trabayador colos mercaos abiertos a l´actividá bursátil, mientres que'l restu de les places europees pesllaron. Wall Street tuvo una bona selmana gracies a la cayida llibre del dólar (que cotiza a 1,22 euros). Agora mesmo l´euru ye una moneda con muncha fuercia respectu a la divisa norteamericana. Los inversores y dellos analistes consideren que la baxada del dólar beneficia una posible recuperanza de la feble economía d´Estaos Xuníos, y ye que les esportaciones norteamericanes podríen medrar con un dólar baxu. París y Llondres pesllaron la selmana con xubes del 1,66% mentantu que Francfort salvó la selmana pasada con un resultáu mui feble.

Otramiente, cola cayida del preciu del petróleu del 1,22% el barril asitiose nos 23,53 dólares. L´anuncia de George Bush de dar por rematada la invasión en terrén iraquino fizo que´l preciu del oru prieto repuntase momentáneamente un 2%. De cualquier manera'l petróleu ta estabilizáu dempués de que l'Exércitu norteamericanu controle una de les mayores reserves petrolíferes del mundiu gracies a la invasión d´Iraq. Les perspectives son que si los norteamericanos saquen al mercáu el petróleu iraquino los precios del barril podríen quedar perbaxu los 20 dólares.