Más de 200 persones na presentación del Conceyu Abiertu Pola Oficialidá

El Conceyu Abiertu Pola Oficialidá celebró esti sábadu en llagar Quelo de Tiñana una espicha de presentación de tolos sos firmantes a la qu'asistieron más de 200 persones.

Enantes d'entamar la espicha, Xulio Casado, de la Xunta Pola Defensa de la llingua, presentó al filólogu Fernando Balbuena, quien fizo un pequeñu entamu en que sorrayó la relevancia del conceyu acabante d'echar a andar y faló de la esistencia d'un marxe de maniobra d'unos trés aós, el tiempu que se calcula que pue llevar la reforma del estatutu, pa ser a meter la oficialidá na carta magna de l'autonomía asturiana. Tres d'elli, xubieron a saludar representantes de los partíos políticos Partíu Asturianista y Izquierda Asturiana y de los sindicatos SUATEA y USO.

Anque naide más nun pasó pel escañu a falar, la espicha, foi un ésitu d'asistencia y tamién de representación. Amás de representantes de les organizaciones yá mencionaes, ente les que rescampló l'asistencia del secretariu xeneral d'USO Francisco Baragaño, l'actu contó cola presencia de representantes de Lliberación, d'Izquierda Xunida y Bloque por Asturies, amás d'un bon númberu de militantes de la Xunta Pola Defensa de la Llingua. Ana Cano, la presidenta de l'Academia de la Llingua Asturiana, institución que pol so calter oficial nun participa nel Conceyu Abiertu pero que se congracia de la so esistencia, tuvo tamién ellí acompañada de Xosé Lluis García Arias y otros académicos.

Carlos Lastra, d'Amigos de la Naturaleza Asturiana, el director de política llingüística Ramón d'Andrés, el director del Muséu de la Gaita Alfonso Fernández, el director d'Asturies.com Fernando de la Fuente o l'editor del selmanariu Les Noticies Inaciu Iglesias foron otros de los nomes que pasaron pel llugar, lo mesmo qu'un bon garapiellu de músicos asturianos, ente los que rescamplaba la presencia de Xosé Ambás de N'Arba o Xuan Nel Expósito, de Felpeyu.