Martín Villa declarará na embaxada arxentina n'España'l 3 de setiembre

|
Cartelu concentración xuiciu a Martín Villa

La Coordinadora estatal d'Apoyu a la Querella Arxentina contra Crímenes del Franquismu (CeAQUA) entamó una campaña en redes sociales de cara a esta cita pa esixir xusticia.

La xueza arxentina María Servini, qu'hai diez años abrió una investigación sobre los crímenes del franquismu tres una denuncia de familiares de víctimes, la conocida como Querella Arxentina, llamó a declarar de manera telemática na embaxada d'esti país n'España a Rodolfo Martín Villa el 3 de setiembre. El dirixente franquista ta investigáu por delitos d'homicidiu agraváu nun contestu de crímenes contra la humanidá por dellos fechos na Transición, ente'l 1976 y el 1978.

Hasta esi día, CeAQUA, na que participa La Comuna d'Asturies, tien en marcha una campaña en redes sociales baxo les etiquetes '#RompamosLaImpunidad' y '#ExigeJusticia' na qu'aporta detalles y información sobre'l procesu. "Daráse'l primer pasu pa poner fin a la impunidá de los crímenes contra la humanidá cometíos durante'l franquismu, una impunidá caltenida más de 40 años polos socesivos gobiernos y que ye una de las más fondes llácares de la nuesa democracia actual", apunten al respeuto.

Concentración n'Uviéu

Pal mesmu día 3, ta convocada una concentración n'Uviéu por La Comuna d'Asturies y la Federación Asturiana Memoria y República (Famyr) na que se reclama "verdá, xusticia, reparación y garantíes de non repetición" y frayar con "la impunidá". Va ser a les 19.30 hores na plaza Porlier.

Contador Estadistiques