Marino y Lealtad déxenlo pal partíu de vuelta

Los gozoniegos igualaron ensin goles cola Multilvera, mentes que los maliayos perdieron pola mínima (1-0) en Formentera.

Marino y Lealtad van tener que marcar en casa si quieren siguir con vida nes eliminatories pol ascensu a Segunda División B. Los d'Oli tornaron de Mutiloa col siempre peligrosu resultáu de 0-0, mesmu qu'algamó na anterior crucie col San Ignacio, pol valor doble de los goles fuera.

Naquella ocasión los de Lluanco amosáronse superiores en Miramar y ganaron por 2-0. El domingu a les 18 hores va disputase'l choque de vuelta colos navarros nel que quieren facer lo propio.

Segunda derrota de la temporada

L'aire, el calor y el prau artificial pesaron-y al Lealtad, qu'ayeri perdió'l so segundu partíu de tola temporada, los dos siguíos. Una arrancada de Moha pela izquierda al poco de comenzar la segunda parte, que finó con un disparu fuerte difícil pa Javi Porrón, sirvió a los baleares pa llevar una victoria pola mínima que tuvo a piques d'impedir Caique con un llanzamientu de falta que finó nel llargueru.

El domingu, tamién a les 18 hores, los de Samuel van disponer de Les Caleyes y del apoyu de la so afición pa tratar de da-y la vuelta a la eliminatoria.

Na imaxe, un momentu del Mutilvera-Marino dende una zona de la grada ocupada por aficionaos lluanquinos. Semeya propiedá del Club Marino.