Mallada dimite como presidenta del PP n’Asturies y pasa a la direición del partíu

|
María Teresa Mallada presentación dimisión

“Ye una dimisión pautada frutu de conversaciones fluyíes cola direición nacional”, esplicó María Teresa Mallada, hasta esti martes presidenta del Partido Popular (PP) n’Asturies. L’ayerana va siguir como diputada y vocera parllamentaria na Xunta Xeneral hasta mayu, mes d'eleiciones, y confirmó que “voi incorporame a la direición nacional”.

Dirixente del partíu n’Asturies dende ochobre del 2020, con Pablo Casado liderando en Madrid, depués de que siguiera’l so mesmu camín Mercedes Fernández un añu enantes pa dir nes llistes del partíu al Senáu, algamando escañu, Mallada dimite agora cinco selmanes depués de que se diera a conocer que nun sería la candidata d’Alberto Núñez Feijóo pa les eleiciones del mayu viniente. “Procedí a poner el mio cargu a disposición del presidente Feijóo proponiendo-y la mio dimisión, decisión qu’adopto pa que podamos abordar la escoyeta d’un presidente nuevu nel menor plazu de tiempu posible”, avanzó esta mañana.

Apuntó que lo deseable sería “torgar la bicefalia”, esto ye, que’l candidatu nuevu debería tamién presidir el partíu n’Asturies. Por último, confirmó que “voi continuar como diputada autonómica y vocera hasta les eleiciones próximes de mayu del 2023 y amás, en feches próximes, voi incorporame a la direición nacional del nuestru partíu dende onde voi continuar representando al Partido Popular d’Asturies y defendiendo los intereses de los asturianos dende la responsabilidá que m’encomienda’l nuestru presidente Feijóo”.

Na imaxe, Mallada esta mañana dando l'anuncia.

Contador Estadistiques