L'Urraca nun va acompañar a los equipos asturianos nel sortéu de Copa del domingu

Los de Posada nun pudieron col Becerril y pierden el suañu de recibir a un Primera División, que sí podría vivir el CD Lealtad.

Nun pudo ser. Un solitariu gol del Becerril, obra de Melero a la media hora, sirvió pa que l'equipu castellanu eliminara al equipu de Posada, que tuvo a dos centenares d'aficionaos na grada.

L'Urraca apertó na segunda parte y pudo igualar nel tiempu añadíu, pero'l porteru llocal Sevi salvó al so equipu de dir a la prórroga. D'esta forma'l Becerril clasifiquen pa la primer eliminatoria de la Copa, que se va xugar tamién a partíu únicu, xunto col Tolosa, FC Andorra, Comillas, Peña Azagresa, Melilla CD, Atlético Antoniano, El Palmar, El Álamo y CF Intercity, onde van cruciase con un Primera División, a esceición del Barcelona, Valencia, Madrid y Atlético, exentos hasta dieciseisavos pola Supercopa.

El sortéu va celebrase'l domingu a les 12.30 hores en Las Rozas, a poques hores del derbi asturianu (16 hores, Carlos Tartiere), y nél van entrar yá'l Sporting y l'Uviéu. Tamién van participar l'UP Langreo, el Marino y el Lealtad, campeón del añu pasáu de Tercera División.

Los conxuntos asturianos de Segunda División, van tener un rival Segunda División B o Tercera, polo que van ser visitantes. Los de Llangréu y Lluanco, Segunda B van facelo con otru de la so categoría, con una pequeña posibilidá de cruciase con ún de superior categoría –3 de los 38, quedando otru exentu–, y visitará Les Caleyes un Primera o un Segunda.

Na imaxe, afición del Urraca en Becerril de Campos. Semeya propiedá del Urraca CF.