Lula da Silva, premiu Príncipe d'Asturies

El xuráu de los Premios Príncipe d'Asturies ta acabante de da-y al presidente brasileñu Ignacio "Lula" da Silva" el premiu d'esti añu na estaya de Cooperación Internacional. L'acta del xuráu sorraya la voluntá del presidente de poner pontes ente los países del Sur d'América y propuestes como la creación d'un Foru Internacional de llucha contra la fame.


La candidatura del antiguu sindicalista y, dende va poco, presidente brasileñu, presentola'l rector de la Universidá d'Uviéu, Juan Vázquez col sofitu de 30 universidades del mundu y personalidaes como'l fotógrafu Sebastiao Salgado. La concesión del premiu al mandatariu más d'izquierdes que nunca nun tuvo Brasil contrasta cola entrega d'esti mesmu premiu nel añu 2.000 a otru presidente brasileñu, Fernando Henrique Cardoso, figura de color políticu bien estremáu del de Lula. Si d'aquella un premiu de cooperación foi a un presidente que defendía les recetes más neolliberales, agora la tortiella da la vuelta dafechu.