Los veteranos del Uviéu y del Universidá van disputar un partíu benéficu de fútbol-sala por África

El I Troféu Benéficu de Fútbol-sala ‘Asturies por África’ va tener llugar esti xueves nel Florida Arena. Los veteranos del Uviéu y del Universidá van enfrentase pa recaudar perres pa construyir un pozu d’agua potable nun pueblu de Gambia.

L’ex árbitru internacional de fútbol Manuel Enrique Mejuto González va pitar esti partíu que va reunir a ex xugadores d’estos dos conxuntos de la ciudá. L’asociación de veteranos del club azul confirmó que la so convocatoria va tar formada por Manolo, Emilio, Segundo, Armando II, Arias, Rafa, Jaime, Manel y Carlos, mentes que tovía nun se conoz la de los universitarios. El partíu, que va principiar a les 19.30 hores, tien una entrada de 3 euros cola fin de recaudar dineru pa la construcción d’un pozu d’agua potable nel pueblu gambianu de Ndungu Kebbeh. Como aliciente, les persones qu’acudan al polideportivu uviedín van entrar nel sortéu de camisetes cedíes por dellos futbolistes asturianos.

Asturies por África ye la ONG qu’organiza d’esti partíu de fútbol-sala benéficu. Fundada nel 2008 con sede n’Uviéu, trabaya en proyeutos de cooperación con Gambia, ente los que destaca la construcción y mantenimientu de dos escueles infantiles nes que se da educación y una comida diaria a 150 neños y neñes d’ente 3 y 7 años. Tamién fai un unvíu periódicu de melecines y material sanitariu col centru médicu Essau Health Center y tien entamao dos proyectos de sensibilización cola Axencia Asturiana de Cooperación al Desarrollu.