Los sindicatos mayoritarios asturianos ven posible otra fuelga xeneral enantes de que fine l’añu

Si Mariano Rajoy nun da marcha atrás colos recortes, habrá una fuelga xeneral enantes de que fine esti añu. Justo Rodríguez Braga y Antonio Pino, secretarios xenerales d’UXT y CC OO n’Asturies, de forma respeutiva, ven probable otru paru.
 
Tanto Pino como Braga coincidieron en que Rajoy debería convocar un referéndum pa que la ciudadanía pueda pronunciase en rellación a si aprueba o non eses polítiques, dao que nun veníen incluyíes nel programa eleutoral del Partido Popular (PP). Confíen en que’l Gobiernu d’Asturies, del PSOE, contribuya a "amortiguar" esos recortes. Pino señaló que yá llegó’l momentu de que les comunidaes autónomes digan “basta yá” ante la magnitú de los recortes. En cualisquier casu, dexaron nidio qu’hai determinaos axustes que nin CC OO nin UXT van aceptar "anque sían obligatorios".
 
Esti vienres, día 24, los dos sindicatos convocaron una concentración a les 11 hores frente a la Delegación del Gobierno estatal n’Asturies que va coincidir cola movilización de los funcionarios. Mentes, el xueves 31 tienen previsto la ellaboración de pancartes y murales nes entraes de les ciudaes del país pa preparar la gran marcha a Madrid del 15 de setiembre. Amás, van poner a la venta "bonos solidarios" pa financiar estes actividaes.
 
Por último, Pino comentó que les midíes del Gobiernu de Rajoy son "antisociales" y tán emprobeciendo a la población. Pal secretariu xeneral de CC OO la crisis tán pagándola los que menos culpa tienen, mentes qu’a los responsables verdaderos "nun se-yos toca".
 
Na semeya, Rodríguez Braga y Pino.