Los sindicatos denuncien irregularidaes nel entamu del cursu

La Xunta de Personal Docente del Principáu, que representa a tolos profesionales de la enseñanza pública non universitaria, dio esti vienres una rueda de prensa pa valorar l'aniciu del cursu escolar y pa presentar la propuesta de negociación conxunta de los cinco sindicatos d'enseñanza (CCOO, UXT, SUATEA, ANPE y CSI-CSIF)

Según la Xunta Docente, les anuncies oficiales de l'alministración, que falen d'un desarrollu "en total normalidá" del cursu escolar tampoco nun son pa tanto. En primer llugar, la xunta destacó que, anque Educación dixo que toles vacantes diben cubrise en primer convocatoria, lo cierto foi que pocos díes dempués de repartise les places apaecieron 160 places vacantes, colo que muncha xente vio col normal enfadu como depués de garrar plaza apaecíen destinos meyores a los que yá nun podíen entrar y que yeren les que tendríen de toca-yos nun procesu normal de repartu. Los cinco sindicatos d'enseñanza apáutense tamién en criticar el barullu burocráticu que llevó a que cerca de la metada del profesoráu en práctiques y bien d'interinos tuvieren asignaos hasta 4 destinos distintos en namás 10 díes. Esti tracamundiu de destinos y axudicaciones nun ye molestia namás pal colectivu docente, como demuestra'l fechu de qu'una selmana depués d'entamar el cursu entovía queden pendientes d'asignación 207 places.

La xunta docente albidra que tres d'estes irregularidaes escuéndese una mengua del presupuestu d'educación pa esti añu, cosa que demostraríen fechos como los cambeos d'asignaciones y les alteraciones na plantiya, que se remocica ensin criteriu apautáu acordies a les necesidaes del momentu. Según los sindicatos la falta d'un documentu de plantiya y los incumplimientos por parte d'Educación tan llevando a la situación actual, que pon en peligru la calidá del sistema educativu y cambia, pa peor, les condiciones de trabayu de los enseñantes.