Los sindicatos d'enseñanza y la Xunta Pola Defensa de la Llingua denuncien "la muerte del asturianu na enseñanza"

CC.OO, FETE-UGT, SUATEA y la Xunta pola defensa de la llingua asturiana convoquen pa esti sábadu una manifestación n'esixencia de la retirada de la propuesta de currículum educativu propuesta pola Conseyería d'Educación. Representantes de les cuatro organizaciones presentaron ayeri la manifestación y los sos conteníos. Baxo'l lema 'Llingua asturiana en toles escueles en condiciones dignes y de normalidá'.

La manifestación va salir a les 13,00 hores de la estación del Norte d'Uviéu, rematando na Plaza la Escandalera. El representante de CC.OO, Primi Abella, la de FETE-UXT, María José Secades, el de SUATEA, Llinu Alvarez Santidrián y el representante de la Xunta Pola Defensa de la Llingua, Xulio Casado, esplicaron como la redacción orixinal de la propuesta de curriculum supoón, de fechu la conversión de l'asignatura de llingua asturiana de voluntaria a optativa en competencia con otres materies curriculares, dalgo que supón pa les organizaciones que cconvoquen la manifestación "un pasu atrás na normalización y na situación de la llingua na educación" y "la muerte lenta del asturianu na enseñanza".

Xulio Casado sorrayó como "Esti gobiernu aprobó un plan de normalización del asturianu qu'agora, cerca del final de la llexislatura, alcontramos que nun se cumplió y qu'incluso se dieron pasos atrás na normalización del asturianu", una afirmación que'l representante de CCOO Primi Abella sorrayó recordando qu'Educación entovía nun fexo l'estudiu xurídicu pa la creación de la especialidá d'asturianu que se comprometiere a llevar alantre. Los representantes sindicales rescamplaron la perda de puestos de trabayu que supondría'l dañu a l'asignatura que s'inxer na redacción del currículum, y recordaron qu'agora son cerca de 200 los docentes que trabayen poniendo asturianu ente primaria y secundaria, ello gracies a unes tases de matriculación que puen esfarraplar dafechu si se pon al asturianu a competir con otres materies.