Los sindicatos d'enseñanza, insumisos énte l'alministración

Cuando la Conseyería d'Educación decidió poner la llingua asturiana como "bable-asturiano" nel curriculum de secundaria, los sindicatos d'enseñanza y l'Academia de la Llingua entamaron una serie de medides reivindicatives contra la discriminación sistemática del idioma nes polítiques educatives. L'Academia de la Llingua llegó d'aquellla a romper rellaciones cola Conseyería, pero ello nun foi abondo pa torcé-y el brazu a educación.

Ayeri, nun comunicáu de prensa conxuntu, los tres sindicatos d'enseñanza con más representación n'Asturies, FETE-UXT, CCOO y SUATEA, anunciaron una segunda fase de movilizaciones que dirán faciéndose más concretes cuando se faiga, pal 17 del mes qu'entra l'Asamblea Xeneral del profesoráu de Llingua Asturiana. Mientres, los sindicatos, basándose nel primer documentu que se ficiere va meses, llamen a facer delles coses a los sos afiliaos, ente les que tan el colgar pancartes de les escueles cola frase "Esti centru imparte llingua asturiana" o facer asamblees en tolos centros educativos d'Asturies plantegando actividaes d'insumisión a la política educativa en materia llingüística del Gobiernu asturianu. Menos escandaloses, pero igualñmente importantes son les peticiones que se fain a los centros de que los Equipos d'Orientación Educativa axusten les encuestes de valoración del alumnáu a la situación llingüística d'Asturies pa que los resultaos algamaos se correspuendan cola realidá o facer en clas actividaes baxo'l lema "Qué ye pa nós la Llingua Asturiana".