Los sindicatos d'educación echen pela Ministra

La ministra d'Educación presentó anteayeri en rueda de prensa'l calandariu d'aplicación de la llei de Calidá de la Enseñanza (LOCE). Ello ye que la comunidá educativa tuvo qu'enterase pelos periódicos del almanaque ministerial, cosa que nun-yos fizo nin gota gracia a los sindicatos del ramu.Dende'l sindicatu asturianu Suatea dicen que la rueda de prensa ministerial ensin convocar primero a los sindicatos supón un despreciu que tampoco nun ye precisamente'l más grande dientro d'una riestra d'ellos qu'inclúi puntos como'l nun pasar el proyectu de llei pela mesa sectorial, colo qu'incumpliría asina'l MEC la llexislación vixente. La tercer fuercia sindical nel enseñu asturianu remembra tamién que-y van pidiendo yá bien de veces al ministeriu al través de la confederación STES el negociar tolos temes qu'afecten al profesoráu n'aplicación de la LOCE ensin que se-yos respondiere. A nivel estatal, l'anuncia del ministeriu, que se fai ensin que se sepia entovía como va financiase l'aplicación de la llei, tamién llevó'l palu de toles fuerces sindicales, dando la casualidá de que CCOO taba acabante de mandar una carta al ministeriu entrugando precisamente por dellos puntos de la llei. Suatea y tolos grupos opuestos a la llei, que cásique defende'l gobiernu en solitario, concueyen en que la LOCE va valir pa da-yos facilidaes a les empreses y poné-y más torgues al sistema públicu nun intentu claru de privatizar la enseñanza