Los senadores del PP caltienen la disciplina de votu nel tema del carbón

Nengún senador del PP frayó la disciplina de votu y los populares refugaron en bloque la primer enmienda al recorte nos presupuestos a la minería del carbón. El vienres va salir hacia Madrid la tercer ‘marcha prieta’ en defensa del sector.
 
Los representantes asturianos, lleoneses y aragoneses del PP nel Senáu siguieron los mandaos del partíu pese a que, nun primer momentu, Juan Morano (PP de Lleón) afirmara pela mañana a los medios de comunicación de que diba apoyar la enmienda del PSOE, la primera de la siete presentaes polos socialistes. Al final de la sesión, señaló que nun votó a favor por “un lapsus”. Namái los tres representantes del Partido Aragonés (PAR), que formen parte del grupu popular, cumplieron colo anunciao y defendieron a los mineros del so país. Foro Asturias Ciudadano foi otra de les formaciones qu’apoyó la enmienda tumbada por 157 votos en contra y 97 a favor.
 
Na defensa de la propuesta socialista, que proponía "posibilitar l’aplicación de los remanentes de les ayudes a les empreses privaes non pagaes l’exerciciu anterior", qu’ascienden a 75 millones d’euros, Yolanda Vicente pidió en delles ocasiones l’apoyu de los senadores populares de Castilla y Lleón, Asturies y Aragón porque’l recorte nes ayudes al carbón afeuta a "munchos ciudadanos y families" d’estos territorios, ensin ésitu. Pa Vicente, los Presupuestos Xenerales del Estáu nun tienen "rigurosidá", nun xeneren "confianza" y "nun respuenden a les necesidaes" del país; por contra, "ponen en peligru a munchos ciudadanos y fíos de mineros". Por ello, reiteró qu’espera que los senadores de los territorios con zones mineres, incluyíu’l vicepresidente primeru de la Cámara, Juan José Lucas, reconsidere la so postura.
 
Nel so primer turnu d’intervención, la popular María del Mar Angulo nun mencionó esti asuntu, pero, tres la insistencia de Vicente, aseguró que los senadores del PP y el Gobiernu estatal "van siguir trabayando pol futuru de les families" y que nun van incumplir les promeses que puedan facer. "Tenemos vergoña y cumplimos lo que prometemos", afirmó. Otra manera, decenes de muyeres de mineros d’Asturies, Lleón y Aragón que taben acreditaes p’asistir como convidaes al debate acabaron espulsaes de la sala por glayar en defensa de la minería y en contra de los recortes a les ayudes al carbón.
 
Con destín al Ministeriu d’Industria
 
La tercera 'marcha prieta' va partir el vienres d’Asturies, Lleón y Aragón el vienres pa concluyir en Madrid, tres 19 xornaes de caminada, el 11 de xunetu. A la llegada de los trabayadores, entamaráse una manifestación con final nel Ministeriu d’Industria que percorrerá les cais de la capital castellana pa recordar al Gobiernu de Mariano Rajoy que’l carbón "ye estratéxicu y que tien futuru". Dende Mieres saldrán en direición a la meseta 60 mineros, mesmu númberu que dende los otros dos territorios.