Los Presupuestos Xenerales del Estáu aumenten la partida pa l'ALLA en 10.000 euros

La diferencia colo que reciben el restu d'academies del Estáu amplíase.

L'Academia de la Llingua Asturiana (ALLA) va recibir 50.000 euros de los Presupuestos Xenerales del Estáu, según afiten les cuentes del Proyeutu presentaú pol Gobiernu. Son 10.000 euros más que nos dos años anteriores, cuando tuvo una partida de 40.000 euros.

La distancia col restu d'academies, sicasí, amplíase. La Real Academia Galega y l’Institut d’Estudis Catalans pasen de recibir 311.380 euros a 333.170, mentes qu'Euskaltzaindia, que contaba con 220.000 euros, algama agora 267.500.

La partida pa la Real Academia España ye de 7.455.300 euros, cuando l'añu pasáu foi de 6.827.420 euros, mentes que la Comisión Permanente de la Asociación de Academias de la Lengua Española cuenta con una tresferencia de 89.510 euros, 5.860 más que nel 2022.

Na semeya, la ministra de Facienda, María Jesús Montero, a la puerta del Congresu col Proyeutu de Llei de Presupuestos Xenerales del Estáu pal 2023.