Los investigadores nun puen acreitar la conocencia de llingua asturiana al facer el so curriculum

|
Error na aplicación

Otres llingües del estáu sí tan reconocíes por ser oficiales.

La Fundación Española para la Ciencia y la Tecnología (FECYT), dependiente del Ministeriu de Ciencia, Innovación y Universidaes, nun reconoz l’asturianu como opción n’aplicación pa facer el currículum vitae normalizáu. Iniciativa pol Asturianu denuncia esta situación tres de recibir la quexa d’una ciudadana hai poques selmanes.

La ferramienta de la institución “nun permite reconocer la formación en llingua asturiana al contrario que’l restu de llingües d’España” y eso ye una “discriminación”. La organización púnxose en contacto cola FECYT pa treslladar esta situación y la rempuesta foi que l’editor “ofrez la opción de la inclusión, como méritos pal investigador, del conocimientu de dellos idiomes oficiales n’España, como son el castellanu, catalán, gallegu y euskera, nun siendo’l ‘asturianu’ una de les llingues que se pue introducir como méritu de conocimientu pol investigador, al nun tar reconocíu como llingua oficial”.

Pa Iniciativa pol Asturianu esta “ye una prueba más de que la falta d’oficialidá provoca una situación de desigualdá ente la ciudadanía que tien una formación en llingua asturiana”. La falta reconocimientu llegal del idioma, al traviés de la oficialidá, “ta xenerando una situación de desigualdá ente los y les investigadores que tienen una formación en castellán o gallegu y los que tienen esa mesma formación n’asturianu”.

Demientres “la llingua asturiana siga siendo un idioma de segunda”, apunten, “esta situación va siguir xenerando discriminaciones, dándose la ironía que mientres el Gobiernu d’Asturies apurre ferramientes pa reconocer los niveles d’asturianu nel marcu européu, dempués nun se pue recoyer esi conocimientu nin se tien esi méritu en cuenta”.

Iniciativa pol Asturianu va treslladar esta reclamación a la Conseyería d’Educación del Gobiernu d’Asturies y a la Dirección Xeneral de Política Llingüística pa que puedan trabayar nesta cuestión col Ministeriu de Ciencia, Innovación y Universidaes "pa que l’asturianu tenga’l mesmu valor que’l restu de llingües d’España".

Contador Estadistiques