Los inversores arrenieguen de la bolsa

Pieslle en negativo nes bolses tres d'una selmana marcada por resultaos empresariales que nun-yos prestaron a los inversores. La recoyida de beneficios por parte de los inversores y lo lloñe que se ve la recuperación económica ficieron que los índices de les principales places bursátiles nun xubieren. Nel pieslle de la selmana l´euru recuperó posiciones énte la debilidá del dólar. Na Bolsa de Madrid el pocu volume de negociu diz muncho del pocu interés inversor na renta variable. L´índiz Ibex-35 pieslló la selmana perbaxo los 7.000 puntos pesllando una selmana plana y ensin grandes blincos.



Los resultaos empresariales nun-yos prestaron a la comunidá inversora. Probetayos resultaos en delles empreses norteamericanes y europees demuestren la debilidá económica d'esti intre, anque dellos resultaos son meyores que les previsiones de los analistes los balances de les empreses demuestren que nun tan nel meyor momentu. Dempués de que´l añu pasáu se ficieren recortes de plantilles asgaya, esti añu les empreses tienen que soportar el coste d´esos despidos. Ente los malos resultaos empresariales destaquen los de les empreses eBay, Saint Gobain, Nortel, Volskwagen y Boeing, mientres que ente les estadístiques de la selmana, los pidíos de bienes duraderos d´Estaos Xuníos medren un 2,1% penriba les previsiones de los analistes. Bon datu tamién de les ventes de nueves viviendes na primer economía del mundiu con una cifra de 1.160.000 viviendes nueves. N´Alemaña el datu del IPC del +0,3% entró nes previsiones.



Nel Vieyu Continente les perdes nel pieslle del vienres pasáu pasarron del 1% nes principales places. Les febles ganancies de les empreses europees baxaron los índices, sobremanera en Francfort, -1%, y París, -1,5%. Al otru lláu del Atlánticu, dempués d´una probetaya selmana, los inversores tornaron al parqué con fuercia. Pela so parte, Wall Street pieslló en positivo'l vienres y l´índiz Dow Jones asitióse nos 9.284,57 puntos gracies a una xuba del 1,89%, mientres el tecnolóxicu Nasdaq trancó nos 1.730,70 puntos con una xuba del 1,72%. Les esperances norteamericanes de meyora de la situación n'Iraq xunta dellos datos estadísticos curiosos tiraron pelos índices tres d'un xueves prietu con una perimportante baxada técnica.



Selmana plana nel paqué madrilanu con un baxu volume de negociu que nun pasó de los 1.690 millones d´euros. L´Ibex pieslló nos 6.903,8 (cayida del 1,11%). Una de les dos noticies estrella de la selmana foi el relativu fracasu de la OPA de Telefónica sobre la so filial Terra. El casu ye que la primer empresa del Estáu nun algamó'l 75% previstu de la compañía d´Internet. De toles maneres Telefónica sigue colos sos planes, y anque agora ye difícil sacar a Terra del parqué, lo que ye seguro ye que la puntucom sal del selectivu Ibex-35. Los rumores dan anuncia de qu'Aguas de Barcelona o Mapfre puen ocupar el sitiu que dexa llibre Terra nel selectivu índiz. La otra noticia de la selmana foi'l rechazu del organismu regulador européu EMEA a aprebar el medicamentu de Zeltia, el compuestu Yondelis. Dempués de dellos díis nos que se calentó'l valor abondo, la cayida foi del 18,5%. Sicasí, la biotecnolóxica gallega entovia va da-yos munchu xuegu a los especuladores. Ente les perdes destaquen les de Metrovacesa, BBVA, SCH, Indra y Mapfre. El meyor valor de la selmana ensin duda foi pa Iberia. La compañía aérea ye la meyor del sector, especialmente pol ésitu de les ventes na rede cola so filial Iberia.com.

El preciu del petróleu trancó nos 28,1 dólares barril, marcando una tendencia baxista de va tres selmanes p'acá. De toles formes el preciu de barril Brent aposentó la selmana pasada. Ente les materies, e preciu del oru xorreció un probetayu 0,25% nel pieslle del vienres pasáu colo que cotiza yá a 362,25 dólares la onza. Nel mercáu de les materies primes tamién destaquen los cinco meses que lleva xubiendo'l preciu del cobre. Dientro de la renta fixo, Xuba de la delda dientru. Bones perspectives de rentabilidá na delda pública mentantu los precios sigan cayendo. L´euru tuvo una perbona selmana onde medro hasta algamar los 1,1525 dólares. De fechu esta foi una de les meyores selmanes del añu pa la moneda europea.