Los escolinos d’hasta cuartu de Primaria nun van tener que guardar distancia colos sos compañeros de grupu

|
Llimpieza de manes escolinos

Los Ministerios de Sanidá, y Educación y Formación Profesional tienen preparáu’l documentu que va servir de base a los centros pa la organización pal cursu escolar viniente. Los grupos hasta cuartu de Primaria han de ser de 15 escolinos –un máximu de 20– que nun van tener que guardar la distancia intepersonal obligatoria.

La imposibilidá a eses edaes de que les neñes y neños puedan caltener de manera estricta los 1,5 metros esixíos fai que les autoridaes apuesten por formar grupos estables pa la so convivencia nel cursu. “Esto posibilitará amás el rastréu de contautos rápidu y cenciellu nel supuestu de que se diera dalgún casu”, esplica’l Gobiernu estatal.

Nel casu de los más mayores, esto ye, quintu y sestu de Primaria, la Secundaria y el Bachilleratu, los centros van tener que reorganizar los espacios de forma qu’haya una separación de polo menos 1,5 metros ente los alumnos dientro del aula. Pa los d'Infantil les mázcares nun serán obligatories; tampoco pa los pequeños de Primaria, sacantes los momentos de posibles contautos con otros grupos, mentes que’l restu ha de llevala siempre cola esceición única de cuando se toma asientu en clase.

Llimpieza y ventilación

Cada centru ha de disponer d’un protocolu de llimpieza y desinfeición adaptáu a les so carauterístiques pero, en cualquier casu, la llimpieza ha de facese polo menos una vegada al día, reforzándose n’aquellos espacios que lo precisen en función de la intensidá d’usu, como ye’l casu de los baños, onde deberá ser de, como poco, trés veces al día. Tamién ha de ventilar les instalaciones de manera frecuente.

Esti documentu va presentase mañana a les comunidaes autónomes na Conferencia Sectorial d’Educación. El testu va indicar tamién la forma de facer la detección precoz de casos posibles de COVID-19 y la xestión afayadiza de los mesmos.

Contador Estadistiques