Los escoceses Tarran, Loína, Los Berrones y Felpeyu van tar nel Intercélticu d’Avilés

Una Nueche en Danza va servir p’abrir per segundu añu’l Festival Intercélticu d’Avilés y Comarca, que suma ventiseis ediciones. Son munches les actuaciones programaes dende’l sábadu hasta’l domingu 30 na villa, Corvera y Pravia, con conciertos de bandes del país como Loína, La Garrapiella, Felpeyu y Los Berrones, y tamién de fuera como los escoceses Tarran o los bretones Nicosyz & Zenkool.

L’aldea celta que se va instalar en La Esposición va abrir mañana a les 19.30 hores con espaciu pa restauración, un mercáu celta y zona de xuegos pa neñes y neños. Un taller de baille asturianu a cargu de Laura Ruiz, a les 20 hores, va servir pa que los asistentes puedan deprender nociones básiques que poner en práutica dende les 22 hores na Nueche en Danza xunto cola Bandina Tuercipié, les Pandereteres de Fitoria y la pareya de gaita y tambor Dani y Giuseppe, con escenariu abiertu depués p’allargar la folixa pela madrugada.

L’Asociación Cultural Esbardu, organizadora del Intercélticu, programa pal restu de díes numberoses actuaciones d’agrupaciones de dientro y fuera del país. Asina, amás de la banda de gaites y el grupu de baille tradicional d’Esbardu, que van facelo a diario dende mañana, van actuar estos díes n’Avilés la Banda Gaites El Gumial, la Banda da Gaitas Ciudad de Cangas de Onís y Gaiteros de Carbón (miércoles) y los grupos de baille tradicional L’Artusu, Blimea y Ximielga la Saya (martes) y los escoceses JDW Highland Dance (del martes al domingu).

Tamién d’Alba acude la Maybole Pipe Band (del martes al domingu), mentes que de Galicia desplázase la Banda de Gaitas Xarabal (de xueves a domingu) y de Breizh, l’agrupación Kerlenn Pondi. El folclor de les Illes Balears tamién va disfrutase cola presencia de S’Estol Porrerenc (sábadu 29 y domingu 30).

El xueves, la Nueche Máxica

No que respeuta a los grupos de música, esta edición el públicu avilesín y los munchos visitantes que s’averen a l’aldea celta de La Esposición van poder disfrutar de Loína (domingu), los bretones Nicosyz & Zeenkool (llunes), La Garrapiella (martes), los escoceses Tarral (miércoles), Felpeyu (vienres) y Los Berrones (sábadu). El xueves, mentes, prográmase una Nueche Máxica de nome ‘Lluna Celta’ cola participación de les agrupaciones escoceses, bretones y gallegues presentes xunto con Esbardu.

La progamación del Intercélticu complétase cola amuesa d’arte ‘Los ástures y el arte de la guerra’ en Les Meanes, pasucais de tribus ástures y nueches temátiques, ente otros. Na xornada final, el domingu 30 dende les 19.30 hores, va celebrase’l pieslle del festival con una marcha de les agrupaciones participantes, la interpretación de los himnos de los países participantes y una andecha intercéltica.

Intercélticu en Pravia y Corvera

Dalgunes de les agrupaciones participantes nel Intercélticu tamién van visitar otros conciertos. Los bretones Kerlenn Pondi van tar el vienres 28 pela tarde en Pravia y el sábadu en Corvera xunto colos escoceses JDW Highland Dance y Maybole Pipe Band, los gallegos Xarabal y la Banda de Gaites de Corvera d'Asturies.

Na semeya, Esbardu na edición pasada.