Los efectos nel mediu de la industria del llagostín

Según vamos allegándonos a les fiestes de navidá y añu nuevu, el mariscu da un reblagu en preciu y en volume consumíu, sobremanera'l llagostín, una especie que

nestes fiestes ataca les baldes de les neveres de los supermercaos en caxes que vienen de les procedencies más estremaes (l'estáu español ye'l tercer importador mundial d'esti mariscu), anque un tantu por cientu cada vegada más grande del llagostín ye de criaderu, un sistema nel que se produz cerca del 30% del total de llagostín que se gasta per estes feches.

Énte la descomanada cantidá de llagostín que se consume nesti tiempu, la organización ecoloxista Greenpeace asoleyó una campaña de concienciación sobre l'iorixe y consecuencies d'esti vezu gastronómicuqu'amenaza un ecosistema enteru, como ye'l de los manglares o bosques costeros tropicales. Según esplica'l responsable de la campaña, Sebastián Losada, la industria "camaronera" como la llamen n'América, sobreesplota los recursos naturales d'Ecuador, Honduras, Colombia o
Brasil al pescar el llagostín con redes d'arrastre qu'esfarraplen tolo qu'atropen. Per otra parte, los criaderos de llagostín fainse ígüando zones de manglar pa convertiles en piscines artificiales, conectaes, eso si, col mar del que reciben agua fresco y al que devuelven a gua puerco contaminao colos munchos productos que se gasten na cría del mariscu. Según Greenpeace, la industria del pescáu y el mariscu presenta estos criaderos como "la revolución azul" que va dar de comer a un mundu famientu, pero a los ecoloxistes abúlta-yos otru estropiciu ambiental. Los mayores centros de producción mundial de la especie asítiense, per una parte n'América Central y del Sur y, per otra, nel sureste asiáticu, rescamplando la tayada del negociu, cada añu mayor, que mueve la República Popular China.

Tocantes a la destrucción de los manglares, Greenpeace ve nello un ataque mui grave a la estabilidá de llos oceanos y a la mesma pesca, en cuantes qu'una hectaria de manglar natural apurre tolos años ente 2 y 12 tonelaes de pescau, ello arriendes de ser criaderos naturales de bien d'especies y de que guarden la costa de la erosión. Pa ver más información sobre esti asuntu puen descargase los 64 folios del informe de Greenpeace sobre'l negociu del llagostín y tamién el vídeu promocional de la campaña